Вазирлар Маҳкамасининг қарори билан Ер ресурсларининг ҳолати бўйича миллий ҳисоботни юритиш тартиби тўғрисидаги низом тасдиқланди, деб хабар беради Norma.
Низом “Ўзбекистон Республикаси Давлат солиқ қўмитаси ҳузуридаги Кадастр агентлиги фаолиятини янада такомиллаштириш чора-тадбирлари тўғрисида”ги президент қарорига мувофиқ қабул қилинган. У қуйидагиларни назарда тутади:
- ер ҳисоботини юритиш тартибини;
- ер ҳисоботи шаклларини тасдиқлашни;
- ер ресурсларининг ҳолати бўйича миллий ҳисоботни шакллантириш ва тақдим этиш тартибини;
- ер фонди тоифаларидаги ўзгаришларни ҳисобга олиш тартибини.
Кадастр агентлигига 2024 йил 1 январга қадар “Ер ҳисобот” автоматлаштирилган ахборот тизимини (ААТ) ишга тушириш ҳамда уни “E-qaror” электрон тизими билан интеграция қилинишини таъминлаш топширилди.
Кадастр агентлигининг Давлат кадастрлари палатаси “Ер ҳисобот” ААТ оператори ҳисобланади. Ер ҳисоботига ўзгартиришлар киритиш, ерларни тоифаларга ажратиш ва бир тоифадан бошқасига ўтказиш натижалари ваколатли давлат органларининг қарорлари асосида “Ер ҳисобот” ААТга киритиб борилади.
Аввалроқ Ўзбекистонда 2023 йил бошидан бери 3 минг гектардан ортиқ ерлар ўзбошимчалик билан эгаллаб олингани тўғрисида хабар берилганди. Шундан қонун бузилиши ҳолатини ихтиёрий бартараф этганлар сони 4235 тага етган.
Маҳаллий ижро этувчи ҳокимият органларининг ер ресурсларини хатловдан ўтказиш натижаларини тасдиқлаш тўғрисидаги қарорлари реал вақт режимида “E-qaror” электрон тизими орқали “Ер ҳисобот” ААТга тақдим этилади.
Ер ҳисоботи Ўзбекистон, Қорақалпоғистон Республикаси, вилоятлар, Тошкент шаҳри ҳамда туман ва шаҳарлар маъмурий-ҳудудий чегарасида жойлашган барча ер эгалари, ердан фойдаланувчилар, ижарачилар ва мулкдорлар бўйича юритилади.
Ҳужжат қонун ҳужжатлари маълумотлари миллий базасида эълон қилинган ва 2023 йил 31 октябрдан кучга кирди.
Изоҳ (0)