Савдо-саноат палатаси “Тошкент шаҳрида Халқаро ҳунармандчилик, бадиий санъат ва дизайн институтини ташкил этиш чора-тадбирлари тўғрисида”ги ҳукумат қарори лойиҳасини муҳокамага қўйди.
Ҳужжат лойиҳаси билан “Ҳунарманд” уюшмаси, Олий таълим, фан ва инновациялар вазирлиги иштирокида Халқаро ҳунармандчилик, бадиий санъат ва дизайн институтини ташкил этиш тўғрисидаги таклифига розилик берилмоқда.
Қуйидагилар институтнинг асосий вазифалари ва фаолияти йўналишлари этиб белгиланади:
- ҳунармандчилик йўналишида олий маълумотга эга кадрларни тайёрлаш, жумладан, “уста—шогирд” анъаналари асосида дуал таълим тизимини кенг жорий қилиш;
- ҳунармандчиликнинг анъанавий турларини сақлаб қолган ҳолда, замон талабларига мослаштириш ва ривожлантириш;
- ҳунармандчилик ҳамда замонавий архитектура, қурилиш, дизайн, тўқимачилик ва бошқа саноат соҳалари ўртасида ўзаро интеграцияни таъминлаш;
- уста-ҳунармандлар томонидан мактабларда амалий сабоқ бериш амалиётини йўлга қўйишга услубий кўмаклашиш;
- ҳунармандчилик соҳасида амалий ва инновацион тадқиқотлар ҳамда замонавий талаблар асосида илмий ва илмий-педагогик кадрлар тайёрлаш.
Институтда бакалавриат таълим йўналишлари ва магистратура мутахассисликларига қабул параметрлари республика меҳнат бозори эҳтиёжлари ҳамда университетнинг моддий-техник имкониятидан келиб чиқиб, Олий таълим, фан ва инновациялар вазирлиги билан келишилган ҳолда институт томонидан белгиланади.
Институтга абитуриентларни қабул қилиш ва битирувчиларни аттестациядан ўтказиш “Ҳунарманд” уюшмаси ҳамда Олий таълим, фан ва инновациялар вазирлиги билан келишилган ҳолда институт томонидан белгиланадиган талаблар, тартиб ва муддатларга мувофиқ амалга оширилади.
Шартнома шартларига мувофиқ, институт битирувчиларига олий таълим тўғрисидаги ҳужжат сифатида тан олинадиган давлат томонидан тасдиқланган намунадаги диплом берилади. Институт ректори муассис томонидан лавозимга тайинланади ва лавозимидан озод қилинади. Институтда талабалар ўқиши учун тўлов-контракт маблағлари миқдори муассис томонидан белгиланади.
Аввалроқ Ўзбекистонда президент фармони билан янги университет ташкил этилиши, шунингдек, мамлакатда Буюк Британия таълим дастури асосидаги халқаро мактаб очилиши тўғрисида хабар берилганди.
Изоҳ (0)