Қашқадарё вилояти ҳокими Муроджон Азимов мурожаатчи фуқаролардан бирининг хонадонига бориб, меҳнатга лаёқатли, забардаст йигитнинг ишламай, “давлатнинг қўлига қараб ётганига” гувоҳ бўлганини, унинг уйига ҳақиқий муҳтож деган маънода бозор-ўчар қилиб борганидан уялиб кетганини маълум қилди. Бу ҳақда “Дарё”га хабар берган вилоят ҳокимлиги ахборот хизмати раҳбари Аҳрор Содиқовнинг билдиришича, воқеа сабаб ҳудуд ҳокими ва шу маҳалла раиси жазоланган.
Забардаст йигит, ишламай ётибди. Нима учун мен унинг уйига бозор-ўчар қилиб олиб боришим керак? Ўзим уялиб кетдим халқдан, маҳалла одамларидан. Одамлар вилоят ҳокими бир дангасанинг уйига бозорлик қилиб олиб келдими дейишларидан, — деган вилоят ҳокими.
Маълум бўлишича, Муроджон Азимов бу воқеани сайёр қабулига келган мурожаатчиларга гапириб берган.
Ўша уйга кирганимга ўзим пушаймон едим. Ёғ, ун, бутун бозорлик қилиб борибман. Борсам, хотини бор, бола-чақаси бор йигит, ишламай ётибди. Бу фуқаро ётиб қолган бўлмаса, касал бўлмаса, ногирон бўлмаса нега биз унга ёрдам беришимиз керак? Шу фуқаронинг ён қўшнисининг уйига кирдим, мол ҳам бор, қўй ҳам бор, эчки ҳам бор. Томорқага ҳам қараган. Унинг томорқасида эса янтоқ босиб кетган, — деган вилоят раҳбари воқеа ҳақида гапирган ҳоким.
Муроджон Азимовнинг айтишича, вилоят раҳбарини шундай хонадонга олиб борган ҳоким ва МФЙ раиси жазоланган.
Аввалроқ Муроджон Азимовнинг Қарши шаҳри ҳокимидан 5 миллион сўм моддий ёрдам олиб, яна пул сўраб келган мурожаатчини уялтиргани ва унинг сўровини рад этгани хабар берилганди.
Оғайни сен ҳам йигисан, меҳнат қилгин. Ишга жойлаштириб қўяман. 3,5 миллион сўмдан 4,5 миллион сўмгача ойлик беради. Ишлайсанми? Ҳозир буйруғингни чиқартираман. Ногиронмассан, кам таъминланмагансан, ишлайсан, пул оласан, — деганди ўша фуқаро билан суҳбатлашган вилоят раҳбари.
Изоҳ (0)