БААга парвоз пайтида Россия президенти Владимир Путин самолётига ракеталар билан қуролланган “Су-35С” қирувчи самолётлари ҳамроҳлик қилди. Бу ҳақда “Коммерсант” хабар берди.
Кремлнинг маълум қилишича, қирувчи самолётлар қўнгунга қадар бутун парвоз давомида самолётга ҳамроҳ бўлган. Россия Мудофаа вазирлиги тақдим этган видеода президентнинг “Ил-96” самолёти тўртта “Су-35С” ҳамроҳлигида парвоз қилаётгани акс этган. Ҳар бир қирувчи тўртта ҳаво-ҳаво ракетасини олиб юрган.
Путиннинг матбуот котиби Дмитрий Песков қирувчилар “турли синфдаги стандарт қуролларни олиб юрганини” айтди.
“Су-35С” рейси Россиядаги эксплуатацион аэродромдан ҳавога кўтарилган ва уни биринчи тоифали учувчилар бошқарган. Президент самолётини ҳаводан қўллаб-қувватлаш учун ҳудуди устидан парвоз амалга оширилган давлатлардан махсус парвоз рухсатномалари олинган. Биз бу давлатлардан ҳамкорлик учун миннатдормиз, — деди Песков гап қайси давлатлар ҳақида кетаётганига аниқлик киритмасдан.
Путин 6 декабрь куни Абу-Дабига БАА президенти Муҳаммад бин Зоид Ол Наҳаён билан музокаралар ўтказиш учун келди. Учрашув аввалида Путин БАА билан муносабатлар даражасини “мисли кўрилмаган даражада юқори” деб атади. Улар Фаластин—Исроил можароси ва Украинадаги вазиятни муҳокама қилишни режалаштирган. Шунингдек, бугун кечқурун Россия президенти Саудия Арабистонига ташриф буюриши режалаштирилган.
Изоҳ (0)