Урушга сафарбар қилинганларнинг қариндошлари Россия президентининг “тўғридан тўғри эфирига” қадар фронтдаги ярадорлар шаҳарни босиб олиши учун Авдеевкага юборилаётганидан шикоят қилди. Бу ҳақда манбаларга таяниб, “Важниe истории” хабар берди.
Россия президенти Владимир Путин 14 декабрь куни тўғридан тўғри эфир ва катта матбуот анжумани ўтказади. Ҳарбийларнинг юздан ортиқ қариндошлари Путиндан Авдеевка яқинида сафарбар қилинганларнинг “қасддан йўқ қилиш белгиларига” эътибор беришни сўради. Россия президентига мурожаатида сафарбар қилинганларнинг яқинлари ўртача оғирликдаги жароҳат олган ҳарбийларни ҳужум бўлинмаларига жўнатиш буюрилганини даъво қилмоқда.
“Путиннинг тўғридан тўғри эфири ва Янги йилга қадар шошишмоқда. Қандайдир натижа керак экан. Атрофдагиларнинг ҳаммаси Авдеевкани қўлга оламиз, кейин музокаралар олиб борамиз, деб айтишмоқда”, — деди сафарбар қилинганлардан бирининг рафиқаси.
Сафарбар қилинганлар ўзини ўзи мустақил деб эълон қилган Донецк халқ республикаси мудофаа кучларида хизмат қилган, шундан сўнг улар фронтга жўнатилган. Ҳарбийларнинг қариндошларининг сўзларига кўра, “йигитларнинг ҳеч бири бу мавзуда ҳеч нарса имзоламаган”.
Авдеевка яқинидаги “ҳужум бригадалари”даги ҳарбийларнинг ўртача ёши 40 ёшдан ошади, дейилади президентга мурожаатда, уларнинг аксарияти сафарбарликдан кейин таътилга чиқмаган. Путинга мазкур мактубни 100 дан ортиқ киши имзолаган.
Россия армиясининг Авдеевкага оммавий ҳужуми октябрь ойидан бери давом этмоқда. Британия разведкаси Авдеевка яқинида рус қўшинлари йил бошидан бери энг катта йўқотишларга дучор бўлганини даъво қилмоқда.
Изоҳ (0)