Ижтимоий тармоқлардаги ҳазил видеолари билан мухлислар эътиборига тушган Бобур Мансуров 29 март куни 31 ёшни қаршилади. Ижодда ўз ўрнини топгунига қадар кабобпаз ва официант бўлган актёр, биринчи вайнини суратга олишдан роппа-роса 10 кун аввал Россияга ишлагани кетмоқчи бўлган.
Бобур Мансуров болалигидан санъатга қизиққан. Аммо оиладаги шароит сабаб санъат тўгаракларига қатнашишга имкони бўлмаган. У яшайдиган қишлоқ Тожикистон билан чегарадош ҳудудда бўлган. Бу ерлик аҳоли чорвачилик ва деҳқончилик билан шуғулланган. Бўлажак актёр ҳам бошқа болалар сингари болаликдан рўзғорга кўмаклашган.
— Сирдарё вилоятида оддий ишчилар оиласида дунёга келганман. Онам асли ўшлик, дадам эса сирдарёлик бўлган. Оиламизда қиз йўқ, беш ўғилмиз. Шу боисдан ҳам болалигимиздан меҳнат қилишга ўрганганмиз. Дадам кабобпаз бўлса-да, барчамизни олий маълумотли қилган. Онам ҳам ўқишни орзу қиларди. Ҳаммамиз олий маълумотли бўлганимиздан кейин ўзи ҳам институтга ҳужжат топшириб, 50 ёшида талаба бўлди, — дейди Бобур Мансуров.
Бобур Мансуровнинг дадаси чойхонада кабобпаз бўлиб ишлаган. Бўлажак актёр дарсдан кейин дадасининг иш жойига бориб, унга кўмаклашган.
— Кабоб пишириш, унинг туз-намагини тўғрилаш қўлимдан келади. Чунки анча вақт дадам билан бирга чойхонада ишлаганман, — дейди Бобур Мансуров.
Актёр болаликдан қўшиқчи бўлишни орзу қилган. Аммо Сирдарёдаги санъат коллежида хонандалик бўлими бўлмагани учун драма актёрлиги бўлимида ўқишга мажбур бўлган. Ўқиш давомида актёрликка меҳри ортиб, катта орзу-умидлар билан Ўзбекистон давлат санъат ва маданият институтига ҳужжат топширган.
— Ижодий имтиҳондан кейин барча орзу-умидларим чил-парчин бўлган. Чунки мен ўз маҳоратимга ишонардим. Аммо икки йилги имтиҳонда ҳам энг паст баллни ўзим олганман. Биринчи йил ижодий имтиҳондан 13, кейинги йил эса 8 балл олганман. Бу умуман истеъдодсиз актёрсан, дегандек гап эди, — дейди Бобур Мансуров.
Кетма-кет имтиҳонлардан йиқилган Бобур Мансуров ўзини тадбиркорлик соҳасида синаб кўрмоқчи бўлади. Қишлоқ марказида Paynet шохобчасини очади. Аммо кўп ўтмай шахобча банкротга учрайди. Яқинлари унга ҳарбий хизматга боришни тавсия қилишади.
— Санъатдан бутунлай кўнглим қолган. “Қўлимдан ҳеч нарса келмайди, истеъдодсизман” деб тушкунликка тушгандим. Устига устак, биринчи йил ҳарбий хизматга қабул қилишмади. Қон босимим борлиги халал берди. Келаси йил эса бир йиллик хизматга қабул қилиниб, Фарғонага йўл олдим, — дейди Бобур Мансуров.
.jpg)
Санъатга ошуфта кўнгил ҳар қандай шароитда ҳам ижод қилишга имкон топади. Бобур Мансуровнинг санъатга қизиқишини билган командирлар уни ҳарбий қисмлар ўтказиладиган танловларда иштирок этишини сўрашади. Муваффақиятли иштирокидан сўнг, жамоа билан бирга ҳарбийлар ўртасидаги ҚВЗда иштирок этишни таклиф қилишади. Командирлар “Агар ғолиб бўлсанг, имтиёз олишинг мумкин”, дейишади. Институтга кириш иштиёқи сўнмаган Бобур Мансуров жамоаси билан астойдил меҳнат қилиб, иккинчи ўринни қўлга киритади.
— Ҳарбий хизматни имтиёз билан якунлаганман. Акам Жаҳон тиллари университетига ҳужжат топширишимни сўраган. Чунки оила аъзоларим ҳам санъаткор бўлишимдан умидларини узишган эди. Акамдан яширинча санъат институтига ҳужжат топширганман. Аммо ижодий имтиҳондан паст балл олганман. Имтиёз сабаб шартнома асосида ўқишга қабул қилинганман, — дейди Бобур Мансуров.
Актёр Ўзбекистонда хизмат кўрсатган маданият ходими Мунаввара Абдуллаева қўлида таҳсил олади. У истеъдодли эканлигини исботлаш учун дарсларда фаол бўлишга ва кастингларда иштирок этишга ҳаракат қилади. Ажабланарлиси шундаки, Бобур Мансуров 8 йил давомида бирорта кастингдан ўтмайди.
— Ҳамма курсдошларим кастинглардан ўтишарди. Аммо мен бирор марта эпизод бўлса-да ролга қабул қилинмаганман. “Кўринишим ёқмайдими, шунчалик хунукманми?” деб ўз-ўзимга савол берардим. Ҳатто бир сериалнинг кастингидан барча курсдошларим ўтишган, мен эса ўтолмаганман. Бир томондан курсдошларимнинг ютуғидан қувондим, бошқа томондан эса ичимда ғалати ғалаён бўлган, — дейди Бобур Мансуров.
Бирорта ролга тасдиқланмаган ижодкор хусусий телеканалларнинг бирига иккинчи режиссёр сифатида ишга киради. Аммо у тўрт ой ишлаб, умуман ҳақ олмайди. Лекин тажриба орттириб, кейинчалик ўзи мустақил сериалга режиссёрлик қилади.
— “Орзулар палатаси” номли сериалга режиссёрлик қилганман. Давлат бужети асосида суратга олинган сериал — илк мустақил ишим бўлган. Шунинг учун ҳам камчиликлари етарлича, — дейди Бобур Мансуров.
Бобур Мансуров молиявий қийинчиликларга кўп учраган ижодкор ҳисобланади. Шунинг учун ҳам вайнер бўлишдан аввал ўзини бутунлай бошқа соҳаларда ҳам синаб кўрган.
— Пулдан етишмовчилик ҳамиша бўлган. Мусофирчиликда таҳсил олган талабалар буни жуда яхши билишади. Уйдагилардан пул сўрашга уялиб, официантлик қилганман. Аммо қийинчиликнинг энг зўри институтни битиргандан кейин бўлган. Санъаткорларнинг ойлиги жуда кам, сёмкаларга умуман чақиришмайди. Аммо яшашингиз учун ҳамиша пул керак. Санъатда келажагимни кўрмаганимдан кейин Россияга ишлагани кетмоқчи бўлганман. Фалон кунга самолёт бор экан деб ҳужжатларни тахт қилиб турганимда курсдошларим вайнерлик қилиш таклифини беришган, — дейди Бобур Мансуров.
Бир қарашда вайнерлик осон кўринса-да, профессионал актёрларнинг кўпи бу ишни ўзига эп кўришмайди. Бобур Мансуров ҳам тўрт йил вайнер бўлиш учун институтда ўқидингми, деган гаплардан қўрқиб, олти ойгача видеоларни оммага чиқармаган.
— Иккиланганмиз, видеолар шахсан менга умуман ёқмаган. Шу боис бир неча ой уларни оммага чиқармаганмиз. Ибрат исмли курсдошим сабаб бўлиб илк видеоларимиз Instagramъга жойланган, —дейди Бобур Мансуров.
Бобур Мансуров оддий одамлар ҳақида ҳазил видеолар суратга олиши билан бошқа вайнерлардан фарқ қилади. Чиқиндихонадаги мотиватор, қурумсоқ ошиқ ҳақидаги видеолар шулар жумласидан.
— Воқеаларнинг кўпи мен ёки дўстларимнинг ҳаётида содир бўлган. Ҳатто чиқиндихонадаги мотиватор воқеасига дуч келганимдан кейин шу ҳақида видео олишга қарор қилганмиз. Маҳалламиздаги чиқиндихона жуда машҳур бўлиб кетди, шундай кунлар ҳам келдики, у ерда видео олишимизга рухсат беришмади, — дейди Бобур Мансуров.
Бобур Мансуров дўстлари билан ижара уйда яшашини яширмайди. У камтарона ҳаёт кечиради ва бундан уялмайди. 2022 йилда унга қурилиш компанияларидан бири реклама қилиш шарти билан икки хонали уй совға қилган. Вайнер 2023 йилда оила қуриб, рафиқаси билан янги уйда яшашни ният қилмоқда.
Изоҳ (0)