Қирғизистоннинг Ўзбекистон билан чегарадош Жалолобод шаҳрида метан қуйиш шохобчаси йўқ. Йўловчи автобуси ҳайдовчилари ёнилғи қуйиш учун Ўзбекистонга боришга мажбур бўлмоқда. Бу ҳақда ижтимоий тармоқлар фойдаланувчиларига таяниб, 24.kg хабар берди.
Октябрь ойида Қирғизистон президенти Садир Жапаров Жалолобод шаҳрига 50 та автобус топширганди.
Ҳайдовчилар ҳар куни Ўзбекистон чегарасигача 100 километрдан ортиқ масофани босиб ўтишади, у ерда навбатга туришади, чегарани кесиб ўтишади, ёнилғи қуйиб, яна орқага қайтишади. Ушбу процедура бир кун вақт олади. Улар бир кун ишлайди, бир кун ёнилғи қуяди, — деб ёзган Х (собиқ Twitter) фойдаланувчиси.
Вазият бўйича 24.kg нашрига изоҳ берар экан, Жалолобод ҳокимлиги ҳудудда ҳали метан қуйиш шохобчасини қуришга улгурмаганини таъкидлади.
Автомобильга газ тўлдириш компрессор станциялари қурилишидан олдин автобусларни йўлга қўйиш халқнинг талаби бўлди. Қолаверса, Ўзбекистон Республикаси билан чегарага бориш унчалик қиммат эмас. Давлат раҳбари Садир Жапаров кутилмаганда шаҳар байрамига (автобуслар) совға қилгани боис, маҳаллий ҳокимият идоралари ёнилғи қуйиш шохобчаси қуришга улгурмади. Худо хоҳласа, 20 декабргача объектни қурамиз ва ҳайдовчилар чегарага чиқмайди, — деди ҳокимликдагилар.
Уларнинг маълум қилишича, ҳомий маблағлари ҳисобидан Сузоқ туманида янги ёнилғи қуйиш шохобчаси қурилмоқда.
Изоҳ (0)