Норвегия жанубида кучли ёмғирдан кейин сув омборларидаги сув сатҳи тез кўтарилди, кўчки ва сув тошқини хавфи туфайли уч мингдан ортиқ одам эвакуация қилинди. Бу ҳақда Reuters хабар бермоқда.
Агентлик маълумотларига кўра, кучли ёмғир Норвегия шарқида, мамлакатнинг энг йирик сув йўли бўлмиш Гломма дарёсида жойлашган Браскерейдфосс электростанцияси тўғонини вайрон қилган.
Дарё суви ўзанидан тошиши туфайли Норвегия жанубининг катта қисмида асосий йўллар ёпилган ва темир йўл ҳаракати тўхтатилган.
Ҳукумат янги тошқинларни кутмоқда.
“Кейинги икки ёки уч кун жуда муҳим, биз кечаю кундуз сафарбарликда бўламиз”, — деди Норвегия бош вазири Йонас Гар Стере.
Тошқин жойидан олинган кадрларда уйларни сув олиб кетганини кўриш мумкин.
Бунгача Скандинавия ва Болтиқбўйи давлатларида бир неча кун давом этган “Ганс” тўфони дарёларнинг тошқинига сабаб бўлганди: йўлларга зарар етган, дарахтлар қулаши оқибатида одамлар жароҳатланган. Ноқулай об-ҳаво туфайли минглаб одамлар электр энергиясисиз қолган.
Изоҳ (0)