Украина ҳарбийлари сичқон ва каламушларга қарши курашиш учун фронтга мушукларни фаол йиғиб кетишни бошлади, деб ёзмоқда Bild газетаси Украина Қуролли кучлари аскарларига таяниб.
Нашр аниқлик киритишича, кемирувчилар жиддий муаммога айланган, чунки улар “аскарларнинг уйқусини бузади, улар ухлаётганда сумкаларини тешиб, кўринган ҳамма нарсани еб кетади”. Каламушлар, илонлар ва сичқонлар фронтнинг жанубий ҳудудларидаги окопларга “ҳужум қилган”. Кемирувчилар каскаларни тешиб, алоқа кабелларига зарар етказмоқда, озиқ-овқат, дори-дармонлар, кийим-кечак ва чарм буюмларни еб кетмоқда.
Кемирувчилар ва илонларга қарши курашиш учун ҳарбийлар ўзлари билан мушук олиб кетишни бошлади. Хусусан, Шайба лақабли мушук “Ҳарбийларга кўрсатган ёрдами учун” жанговар медал олди, деди жангчилардан бири.
23 ноябрь куни Japan Times газетаси Украина армиясининг окопларида сичқонлар 2022 йилга қараганда анча кўпайганини хабар қилди. Журналист Эммануэл Пешонинг сўзларига кўра, кемирувчилар иссиқ жой ва озиқ-овқат излаб окопларни босиб кетган. UNIAN аввалроқ украиналик ҳарбий хизматчилардан бирининг видеосини эълон қилган, унда қишки этиклар ва кабеллар атрофида сичқонлар галаси югураётгани акс этганди. Аскар уларга фонарни ёритгач, кемирувчилар қочиб кетган.
Изоҳ (0)