Болгария президенти Румен Радев Ички ишлар вазирлигининг зирҳли техникасини Украинага топшириш бўйича келишувга вето қўйди. Ташаббус 22 ноябрь куни парламент томонидан маъқулланган эди. Бироқ Радев ушбу техникалар болгар чегарачилари ва қутқарувчиларининг ўзига керак, деган фикрда.
“Украинага берилаётган зирҳли, бутун ерусти транспорт техникаси Болгария чегарасини ҳимоя қилиш ҳамда табиий офатлар ва бахтсиз ҳодисалар пайтида аҳолига ёрдам кўрсатиш учун ишлатилиши мумкин. Болгария фуқароларининг ҳаёти ва саломатлиги асосий устувор вазифа бўлиши керак”, — деди Радев.
У келишувни қайта кўриб чиқиш учун парламентга қайтарди. Болгария бош вазири Николай Денков парламентдаги кўпчилик президент томонидан қўйилган ветони рад этишига ишонмоқда, деб хабар берди Болгария миллий телевидениеси.
Битим Украинага Болгария Ички ишлар вазирлиги фойдаланмаётган қуролли зирҳли транспорт техникасини беришни назарда тутади. Техникалар тахминан 40 йил олдин ишлаб чиқарилган ва Болгария Ички ишлар вазирлиги омборларида сақланади.
Киев 100 га яқин бронетранспортёр ва улар учун эҳтиёт қисмлар олиши кутилган эди.
Сентябрь охирида Болгария парламенти Украинага носоз С-300 ракеталарини етказиб беришни ҳам маъқуллаганди. Расмийларнинг тушунтиришича, Болгария носозликни бартараф этиш имкониятларига эга эмас, агар улар Украинага топширилса, Киев бу ракеталарни тузатиши мумкин. Болгария мудофаа вазири Тодор Тагаревнинг аниқлик киритишича, Украинага фақат ракеталар юборилади, тўлиқ С-300 тизимлари эмас.
Изоҳ (0)