Андижон вилояти Олтинкўл туманида ўқишни кўчириб бериш билан боғлиқ фирибгарлик ҳолати фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Олтинкўл туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда Ж.З. исмли шахс фуқаро А.Й.нинг ишончига кириб, унинг қўшни Қирғизистоннинг Ўш давлат университетидаги ўқишини Андижон қишлоқ хўжалиги ва агротехнологиялар институтига кўчириб бериши эвазига 1,5 минг долларни фирибгарлик йўли билан олган вақтида далилий ашёлар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Бундан олдин Бухоро ва Фарғона вилоятларида ўқишни кўчириб бериш билан боғлиқ фирибгарлик ҳолатларига чек қўйилганди. Шунингдек, Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушган эди.
Изоҳ (0)