Вазирлар Маҳкамаси қарори билан “Солиқ тўловчиларни ҳисобга қўйиш соҳасидаги айрим давлат хизматларини кўрсатиш бўйича маъмурий регламентларни тасдиқлаш тўғрисида”ги қарорга ўзгартириш ва қўшимчалар киритилди.
Ҳужжат билан жисмоний шахсларнинг жами йиллик, ихтиёрий ва дастлабки тарздаги ҳамда чет эл жисмоний шахсининг мол-мулкини реализация қилишдан олиндан даромадлари тўғрисидаги декларацияларини тақдим этиш бўйича давлат хизматини кўрсатишнинг маъмурий регламенти тасдиқланди.
Декларацияни қуйидагилар орқали топшириш мумкин:
- Давлат хизматлари марказлари;
- Электрон солиқ хизматлари портали;
- Ягона интерактив давлат хизматлари портали.
Ваколатли орган солиқ декларацияси келиб тушган вақтдан бошлаб 5 иш куни ичида солиқ декларациясидаги маълумотларни тўғрилигини текшириб чиқади, маълумотларнинг тўғрилигига ишонч ҳосил қилгач, солиқ декларациясини қабул қилади ва маълумотлар нотўғрилиги аниқланган тақдирда, сабабларини кўрсатган ҳолда декларация юборувчини маълумотларни беш иш куни ичида тўғриланган ҳолда қайта ҳисобот юбориш ҳақида хабардор қилади.
Бунда ваколатли орган QR-код қўйилган жами йиллик даромад тўғрисидаги декларация бланкасини ташриф буюрган ҳолда мурожаат этилган тақдирда, Давлат хизматлари марказига, электрон тарзда мурожаат этган тақдирда, шахсий кабинети ёки ЯИДXP орқали декларация юборувчига электрон тарзда юборилади.
Давлат хизматлари маркази декларация бланкаси келиб тушгандан сўнг 10 дақиқа ичида уни декларация топширувчининг электрон манзилига юборади ва бу ҳақда ахборот тизими орқали хабардор қилади.
Эслатиб ўтамиз, 2019 йилнинг октябрь ойида 2020 йил 1 январдан бошлаб Ўзбекистонда давлат хизматчилари айрим тоифаларининг мол-мулкини, даромадлари ва харажатларини декларациялаш тизимини босқичма-босқич жорий этишга қаратилган Президент қарори лойиҳаси жамоатчилик муҳокамасига қўйилганди.
Изоҳ (0)