Қорақалпоғистон Республикасида пул эвазига ўқишга киритиб қўйишни ваъда қилган проректор ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Кегейли туман бўлими томонидан ИИВ ходимлари билан ҳамкорликда тезкор тадбир ўтказилган. Тадбирда “Ажиниёз” номидаги Нукус давлат педагогика институти проректори М.Ж. фуқаро Х.Н.ни ушбу институтга ўқишга киритиб қўйиш эвазига 3 минг доллар пора талаб қилиб олган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Январь ойида Бош прокуратура ҳузуридаги департамент Бухоро ва Фарғона вилоятларида ўқишни кўчириб бериш билан боғлиқ фирибгарлик ҳолатларига чек қўйганди. Бир неча кун олдин эса Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушгани тўғрисида хабар берилди.
Изоҳ (0)