“Толибон” Афғонистондан Покистонга оқиб ўтадиган Кунар дарёси сувини бутунлай тўсиб қўйишини маълум қилди. Бу ҳақда “Толибон” бош вазирининг иқтисод бўйича ўринбосари Мулла Абдул Ғани Бародарга таяниб, “Дарё”нинг Афғонистондаги мухбири хабар берди.
Бародар “боши кетса ҳам” Кунар дарёсининг сувини аввалги ҳолига қайтаришини маълум қилди. У ҳукуматнинг иродаси кучли экани ҳамда Афғонистонни қайта қуриш бўйича турли режалари борлигини иддао қилди. “Толибон” расмийсининг мазкур баёноти Покистон муваққат ҳукуматининг афғон қочқинларини Покистондан депортация қилиш тўғрисидаги қарорига жавобан янгради.
Покистонда афғон муҳожирларини депортация қилишнинг иккинчи босқичи бошланган. Жумладан, Покистон ҳукумати 2024 йилнинг январига қадар 1 миллион муҳожирни депортация қилишини эълон қилди. Қонуний яшаш ҳужжатларига эга бўлмаган барча афғон қочқинлари январь ойига қадар Покистондан чиқариб юборилади.
Аввалроқ Покистон расмийлари афғон фуқароларини депортация қилишнинг иккинчи босқичида БМТнинг Қочқинлар бўйича агентлигида рўйхатдан ўтган қочқинлар ҳам депортация қилинишини айтганди.
Изоҳ (0)