Тошкент шаҳар ҳокимлиги “Янги Ўзбекистон” боғидаги “Аждодлар хотираси” мемориалига ўтиш йўли тўсилгани юзасидан тарқалган хабарларга муносабат билдирди.
Маълум қилинишича, “Янги Ўзбекистон” боғини эксплуатация қилиш ва сақлаш дирекцияси қоровули томонидан гўёки бош вазирнинг топшириғига асосан аҳоли “Аждодлар хотираси” мемориалига яқинлаштирмаслиги бўйича айтилган гаплар ҳеч қандай асосга эга эмас ва ҳақиқатга мутлақо тўғри келмайди.
Айни пайтда ҳокимлик томонидан видеода акс этган ходимлар фаолияти устидан хизмат текшируви ўтказилмоқда, пойтахт аҳолиси ва меҳмонларига “Янги Ўзбекистон” боғига бориш, ундаги “Аждодлар хотираси” мемориалига яқинлашиш ва уни томоша қилишда ҳеч қандай тўсқинликлар йўқ.
Ўз навбатида, айни пайтда боғ ҳудудида кириб келаётган янги йилни муносиб кутиб олиш, халқимизга байрамни кўтаринки руҳда нишонлашлари учун қулай шарт-шароитлар яратиш мақсадида Янги йил композициясини барпо этиш ишлари бошланганини билдирамиз, — дейилади хабарда.
Эслатиб ўтамиз, Тошкент вилоятининг пойтахтга туташ қисмида Қибрай туманида жойлашган “Янги Ўзбекистон” боғи 2021 йил 31 август куни очилган. Президент Шавкат Мирзиёев боғ ва монументнинг тантанали очилиш маросимида иштирок этиб, нутқ сўзлаганди.
Изоҳ (0)