Ижтимоий тармоқларда «Янги Ўзбекистон» боғидаги «Истиқлол» стелласи барельефига зарар етгани, йўлакларда ёриқлар пайдо бўлгани ва бошқа камчиликлар акс этган суратлар тарқалганди. Ҳолатга Қурилиш вазирлиги муносабат билдирди.
Унда айтилишича, вазирлик матбуот хизмати ходимлари «Янги Ўзбекистон боғи»да бўлиб, мавжуд ҳолатни ўрганди. Барельеф муаллифи, ҳайкалтарош Шоҳрух Ўрозовнинг вазирликка билдиришича, барельеф ҳайкалининг ҳозирги кўриниши вақтинча гипсдан тайёрланган ва стелланинг юзасига мослаб ишланган ҳайкалтарошлик иши саналади.
Шу кунларда ижодий ишларни бадиий даражаси юқори бўлиши учун уни бронзага кўчириш ишлари олиб борилмоқда. Унинг маълум қилишича, барча ҳайкалтарошлик намуналари одатда дастлаб гипсдан тайёрланади. Сўнг маълум синов муддати ўтгач, бронза ёки тошларга кўчирилади.
Ҳозирда стелла мажмуасига ишланган барельефнинг бронза кўриниши деярли 80 фоиз тайёр ҳолатга келтирилган ва тез кунларда стелла мажмуасига олиб келиб ўрнатилади.
«Аслида ҳайкалтарошлик технологияси биринчи эскиз тайёрланади, кейин ички модель, ундан кейин гипс вариантда модель яратилади. Сўнг қолип олиб қаттиқ материалларга — бронза, мис ёки тошларга кўчирилади.
Ижтимоий тармоқларда ишлар сифатсиз қилинган дейилмоқда. Аслида сифатсиз эмас, гипс вариантда турибди. Ёмғир, қор таъсирида устидаги бўёқлари кўчган, лекин гисп варианти турибди. Ҳозирда бронзага кўчириш жараёни жадаллик билан кетмоқда. Уни олиб келиб ўрнатилганидан кейин гипс олиб ташланади ва бронза вариантида ундай ёмон кўриниш юз бермайди», — деган Шоҳрух Ўрозов.
Тармоқда тарқалган суратларда боғдаги тротуарларга ҳам зарар етгани кўрсатилганди. «Янги Ўзбекистон» боғи маъмурияти вакили Миржалил Мирқосимов буни байрамлар вақтида йўловчилар оқими катта бўлгани билан изоҳлаган.
Эслатиб ўтамиз, Тошкент вилоятининг пойтахтга туташ қисмида Қибрай туманида жойлашган «Янги Ўзбекистон» боғи 2021 йил 31 август куни очилган. Президент Шавкат Мирзиёев боғ ва монументнинг тантанали очилиш маросимида иштирок этиб, нутқ сўзлаганди.
2021 йилнинг ноябрида ушбу боғдаги Мустақиллик монументи Туркиядан олиб келинган материаллардан қайта реконструкция қилинаётгани тўғрисида хабарлар тарқалганди. Ҳолатга реконструкция ишларини олиб бораётган Туркиянинг Outdoor Factory Acik Hava Fabrikas ширкати мутахассиси Синан Тураман изоҳ берган.
Унда ушбу монумент лойиҳасини қисқа муддатларда барпо қилиш вазифаси юклатилгани, аммо Туркияда коронавирус пандемияси сабабли белгиланган карантин чекловлари натижасида зарур мутахассис ва хом ашё маҳсулотларини ўз вақтида Ўзбекистонга олиб келиш имконияти бўлмагани, натижада монументнинг муҳим бўлган тарихий шахслар, давлат арбоблари ва ҳодисаларни акс этувчи деталлари тўлиқ ўрнатилмагани билдирилган. COVID-19 пандемияси билан боғлиқ чекловлар юмшатилгандан кейин бу ишларни амалга ошириш имконияти пайдо бўлган.
Маълумот учун, «Янги Ўзбекистон» боғи ва «Истиқлол» мажмуаси қурилишининг пудратчиси, давлат харидлари портали маълумотларига кўра, Mimar Group ҳисобланади. Қурилиш-монтаж ишлари қиймати, давлат харидлари порталидаги иккита лотга мувофиқ, мос равишда 146,5 миллиард ва 47,8 миллиард сўмга баҳоланган.
Изоҳ (0)