Бирлашган Миллатлар Ташкилотининг Ўзбекистондаги доимий координатори Роли Астхана бизнесни барқарор ривожлантириш мавзусида Тошкентда ташкил этилган форумда барқарор бизнес амалиётига ўтиш ва уларни илгари суриш хусусий секторнинг муҳим ўрнини таъкидлади. Астхана бу орқали миллий ва глобал барқарор ривожланиш мақсадларига эришиш мумкинлигини билдирган.
«Сўнгги йилларда Ўзбекистон янада барқарор келажак сари илғор қадамлар ташламоқда. Буни ҳукуматнинг фаолиятида ҳам кўряпмиз ва бу жуда таҳсинга сазовор. Шу билан бирга, алоҳида таъкидламоқчиманки, барқарор ривожланишга фақат давлат билан ҳамкорлик қилиш орқали эришиб бўлмайди, чунки хусусий сектор ҳам инклюзив ва барқарор ўсишнинг ажралмас қисми ҳисобланади. БМТ бош котиби таъкидлаганидек, «хусусий секторнинг саъй-ҳаракатларини талаб қилмайдиган ягона глобал мақсад йўқ», — деди координатор.
70 дан ортиқ компания вакиллари иштирок этган форум Ўзбекистонда экологик, ижтимоий ва бошқарув (ESG) амалиётларини муҳокама қилиш ва БМТнинг барқарор ривожланиш тамойилларини хусусий секторга интеграциялаш бўйича биринчи платформа бўлди.
БМТ бош котиби ёрдамчиси, Глобал шартномаси ижрочи директори Санда Оджиамбо форум иштирокчиларига видеомурожаат билан чиқиб, Глобал шартнома аҳамияти ҳақида гапирди.Инсон ҳуқуқлари, муносиб меҳнат, атроф-муҳит ва коррупцияга қарши курашни қамраб олувчи 10 тамойилимиз глобал муаммоларни ҳал қилишда компаниялар ва жамиятларга фойда келтирадиган бизнес ривожланиши учун асос яратади. Бугунги кунда 16 000 дан ортиқ компания ва 3 000 дан ортиқ нотижорат ташкилотлар БМТнинг Глобал Шартномасига мувофиқ барқарор, масъулиятли бизнес сиёсати ва амалиётини амалга ошириш мажбуриятини олган. Ушбу кучли мажбурият орқали улар 2030 йилгача Барқарор ривожланиш кун тартибининг муваффақиятини қўллаб-қувватламоқда. Биз тўғридан-тўғри географик қамровимизни кенгайтирмоқдамиз ва янги маҳаллий ва кўп мамлакатли тармоқларни қурмоқдамиз. Сизнинг қўллаб-қувватлашингиз билан биз Ўзбекистон, кейин эса Қозоғистондан бошлаб, Марказий Осиёда кўп мамлакатли тармоқ яратишга умид қиламиз. Бирлашган Миллатлар Ташкилотининг Глобал Шартномаси сиз билан ёнма-ён ишлайди ва бизнесни дунёни яхшилаш учун бирлаштиради.
БМТ бош котиби ёрдамчиси, Глобал шартномаси ижрочи директори Санда Оджиамбо
Тадбирнинг кейинги муҳокамалари ҳукумат, хусусий сектор, халқаро ташкилотлар, шунингдек, БМТ Глобал Келишувининг Туркия, Грузия, Швейцария ва Лихтенштейндаги маҳаллий тармоқлари мутахассисларини бирлаштирди.
Форум иштирокчилари Ўзбекистондаги БМТ Глобал Келишувининг биринчи иштирокчилари вакиллари: Korzinka супермаркетлар тармоғи асосчиси ва кузатув кенгаши раиси Зафар Ҳошимов, Artel Electronics компаниясининг молиявий директори Бектемир Муродов ва Silverleafe компаниясининг бош директори Дан Паттерсондан шу соҳада олиб борилаётган ишлар ҳақида маълумотга эга бўлди. Ушбу уч компания, шунингдек, БМТнинг барқарор ривожланиш бўйича бизнес коалициясининг Ўзбекистондаги асосчиси ҳисобланади. Улар БМТнинг Глобал келишувининг меҳнат, инсон ҳуқуқлари ва атроф-муҳитни муҳофаза қилиш бўйича ўнта тамойилини тарғиб қилишга аҳд қилган. Муҳокамалар инсон ҳуқуқлари ва меҳнат шароитлари, атроф-муҳит ва бизнесни модернизациялаш соҳасидаги барқарор амалиётларни ёритиб берди.
Зафар Ҳошимов ўз нутқи давомида қарор қабул қилишда барқарор ва узоқ муддатли ёндашув муҳимлигини таъкидлади: «Биз ўз фаолиятимизни Ўзбекистонда замонавий чакана савдо тармоғини яратишдан бошладик, ва қисқа муддатли мақсадлардан узоқ муддатли барқарор мақсадларга ўтиш компаниялар олдида кўплаб вазифаларни қўяди. Аммо умуман олганда, биз узоқ муддатли стратегиялар анча фойдали ва иқтисодий жиҳатдан самарали эканлигига гувоҳ бўлдик. Биз бу борада жуда кўп куч ва энергия сарфлаймиз ва мен буни жуда яхши иқтисодий сармоя деб биламан. Компаниямизда амалга оширилган амалиёт EТТБ ва ОТБ маблағларини жалб қилишимизга катта ёрдам берди. Ўсиш ва муваффақият сари бораётган ҳар қандай компанияга шуни айтмоқчиманки, ESG ва барқарор стандартларни жорий қилиш солиқ эмас, бу инвестиция ва унга шундай муносабатда бўлиш керак».
АмЧам Ўзбекистон халқаро бизнес ассоциацияси ижрочи директори Татяна Бйструшкина ҳам форум иштирокчиларининг фикрларини қўллаб-қувватлади: «Бизнес прагматик. Инвестиция қилинган ҳар бир доллар фойдали бўлиши керак. Бугун хусусий сектор вакиллари таъкидлаганидек, ESG сармоядир. Глобал Шартнома бизнесни ўқитиш, билим ва илғор тажриба алмашиш ва бизнесни ESGдан яқин келажакда ўзини оқлайдиган сармоя сифатида фойдаланишга ундашда алоҳида рол ўйнайди».
Изоҳ (0)