Пенсия жамғармасига йўлланган саволлардан бирида беш йиллик иш стажига эга фуқаро 55 ёшда пенсияга чиқмоқчи экани тўғрисида бўлган.
Фото: “Дарё” / Мадина Нурман
Қонунчиликка кўра, Ўзбекистонда ёшга доир, ногиронлик ва боқувчисини йўқотганлик пенсия турлари бор. Ёшга доир пенсия олиш ҳуқуқига эркаклар 60 ёшга тўлгач, иш стажи камида 25 йил бўлган тақдирда, аёллар 55 ёшга тўлса, иш стажи камида 20 йил бўлган тақдирда эга бўлади.
“Пенсия тайинлаш учун етарлича иш стажига эга бўлмаган шахсларга ёшга доир пенсиялар камида 7 йил иш стажи мавжуд бўлган тақдирда, бор стажга мутаносиб миқдорда тайинланади”––дея маълум қилди жамғарма. Яъни қонунчиликда 5 йиллик иш стажи билан пенсия тайинлашга рухсат берилмаган.
Маълумот учун, пенсия миқдори иш стажининг муддатига боғлиқ бўлади. Ишламайдиган пенсионерларга пенсияларни яшаб турган жойдаги Пенсия жамғармаси бўлимлари тўлайди. Ишлаётган пенсионерларга эса пенсия иш жойида тўланади.
Ҳозирда Ўзбекистонда пенсия олувчиларнинг умумий сони 3 миллион 839 минг 508 нафарни ташкил қилмоқда. Жорий йилнинг 1 июнь ҳолатига кўра:
- ёшга доир пенсия олувчилар 3 миллион 182 минг 617 нафар;
- ногиронлик пенсиясини олувчилар 426 минг 532 нафар;
- боқувчисини йўқотганлик пенсиясини олувчилар 230 минг 359 нафар.
Президентнинг 2023 йил 17 ноябрдаги фармони билан 1 декабрдан республикада пенсиялар 7 фоизга оширилди. Яъни пенсияни ҳисоблашнинг базавий миқдори – 372 минг сўм, ёшга доир энг кам пенсия миқдори 725 минг сўм этиб белгиланди. Шу билан бирга, ногиронлик пенсиялари, жумладан иш стажи тўлиқ бўлмаган чоғдаги ногиронлик пенсиясининг энг кам миқдори – 800 000 сўм, иш стажи тўлиқ бўлмаган чоғдаги ёшга доир пенсиянинг энг кам миқдори қўшимча тўловни ҳисобга олган ҳолда 608 000 сўмга етказилди.
Изоҳ (0)