Ўзбекистонда “суюнчи пули” олиш тартиби ва миқдори маълум қилинди

Халқ тилида “суюнчи” нафақаси деб аталадиган бола туғилганда бериладиган бир марталик нафақа амалдаги қонунчиликка мувофиқ, ҳар бир туғилган фарзанд учун алоҳида тўланади. 

Пенсия жамғармаси берган маълумотларига кўра, бола туғилганда бериладиган бир марталик нафақа суммаси – меҳнатга ҳақ тўлашнинг энг кам миқдорининг 70,3 фоизи деб белгиланган. Яъни ҳозирги кунда бу миқдор 688 минг 940 сўмни ташкил этади.

Президент фармони билан жорий йил 1 декабрь кунидан мамлакатда иш ҳақи, пенсия ва нафақалар миқдори 7 фоизга оширилади. Хусусан, меҳнатга ҳақ тўлашнинг энг кам миқдори – ойига 980 минг сўмдан 1 миллион 50 минг сўмга кўтарилади. Бунда “суюнчи” пули миқдори ҳам 738 минг сўмга етади.

“Суюнчи пули” қандай олинади?

Ҳозирда “суюнчи” нафақасини тайинлаш бўйича хизматлар фуқаро мурожаатисиз амалга оширилмоқда. Яъни, бола туғилганда унга бериладиган исм-шариф, отасининг исми, ота-она ва уларнинг никоҳи, бола рўйхатга қўйиладиган поликлиника ва ички ишлар бўлими, навбатга қўйиладиган давлат мактабгача таълим ташкилоти ҳақидаги барча маълумотлар тиббиёт муассасаси (туғуруқхона, шифохона туғруқ бўлими, оилавий поликлиника) томонидан “Туғилиш ва ўлимни, шу жумладан, перинатал ўлимни электрон рўйхатга олиш” автоматлаштирилган ахборот тизимига киритилади.

Пенсия жамғармаси томонидан барча зарурий маълумотлар тиббиёт муассасаси ва ФҲДЁ ахборот тизимларидан электрон шаклда олинган ҳолда “суюнчи” нафақаси автоматик равишда тайинланади.

Бунда боланинг отаси ёки онаси Пенсия жамғармасига мурожаат қилмасдан тўғридан тўғри Халқ банкининг исталган филиалига мурожаат қилиш орқали “суюнчи” нафақасини олиш имконияти яратилган.

“Суюнчи пули” қанча муддатгача берилади?

Фуқаронинг хоҳишига кўра, бола туғилганда тўланадиган бир марталик нафақа Халқ банкига ҳам мурожаат қилмасдан банк картасига ўтказиб берилиши мумкин.

Бола туғилгандан бошлаб 6 ой муддат ичида бир марталик нафақа пулини олиш учун Халқ банкининг исталган филиалига мурожаат қилиш мумкин.

Пенсия жамғармаси нафақа тайинлаш ва тўлаш жараёнлари осонлаштирилгани натижасида “суюнчи” нафақасини олувчилар сони кўпайиб бораёганини хабар қилди.

• Масалан, Ўзбекистонда 2022 йилда туғилган болалар сони 932,2 минг нафарни ташкил этган бўлса, “суюнчи” нафақаси шундан 922,4 минг нафарига (98,9 фоиз) тўлаб берилган.
• Таққослаш учун, 2018 йилда туғилган болалар сони 768,5 минг нафарни ташкил этиб, “суюнчи” нафақасини олиш учун 681,7 минг нафар (88,7 фоиз) мурожаат қилган.