Франция президенти Эммануэл Макрон мамлакатда аёлларга нисбатан зўравонликка чек қўйиш ниятида эканини маълум қилди ва уларга ёрдам бериш чораларини маълум қилди. Бу ҳақда у Х (собиқ Twitter) ижтимоий тармоғида эълон қилинган видеомурожаатида маълум қилди.
Макроннинг таъкидлашича, аёллар ҳар куни ёмон муаомалар, таъқиб ва зўравонликка дучор бўлади.
“Биз бунга чек қўйишимиз мумкин ва керак, биз шундай қиламиз”, — деди Франция раҳбари Халқаро аёлларга қарши зўравонликка барҳам бериш куни муносабати билан мамлакат фуқароларига мурожаатида.
У ҳуқуқ-тартибот идоралари “2022 йилда 244 минг оилавий зўравонлик ҳолатини қайд этгани, бу 2017 йилга нисбатан икки баробар кўп”лигини таъкидлади.
Макрон бундай рақамлар аёлларнинг зўравонлик ҳақида гапиришда эркинроқ бўлганини кўрсатишини таъкидлади.
“Аммо бу 2022 йилда 118 нафар аёл ўз жуфтлари қўлидан ҳалок бўлгани ҳақидаги ҳақиқатни ўзгартирмайди”, — дея қўшимча қилди у.
Шунингдек, Макрон аёлларга ёрдам бериш чораларини ҳам эълон қилди. Хусусан, ҳуқуқ-тартибот идоралари томонидан оилавий зўравонлик содир этган шахслар киритиладиган маълумотлар базаси яратилади. Бундан ташқари, 1 январдан Францияда ҳаётий қийин вазиятга тушиб қолган зўравонлик қурбонларига моддий товон пули тўланади.
Изоҳ (0)