Россия Ички ишлар вазирлиги Меtа компанияси матбуот котиби Энди Стоунни федерал қидирувга берди. Бу ҳақда ИИВ маълумотларига таяниб, “Коммерсанть” хабар берди.
Хабарга кўра, қидирув картаси маълумотлар базасида 2023 йилнинг февралида пайдо бўлган, бироқ унга ҳозиргина эътибор берилган. Шу билан бирга, ноябрь ойида Россия судларидан бири Стоунни терроризмни тарғиб қилиш (Жиноят кодексининг 205.1-моддаси 2-қисми) моддаси бўйича сиртдан ҳибсга олишга қарор қилган.
2022 йил март ойида Россия Тергов қўмитаси Меtа ходимларига, жумладан, Стоунга нисбатан экстремистик фаолиятга чақириш ва террорчилик фаолиятига ёрдам бериш моддалари бўйича жиноий иш қўзғатган. Бунга компаниянинг ижтимоий тармоқларда россиялик ҳарбийларга нисбатан зўравонлик чақириқларини блокламасликка қарор қилгани сабаб бўлган.
Ўша ойда Россия расмийлари компаниянинг Facebook ва Instagram тармоқларини блоклаб қўйган ва Меtа'нинг ўзини “экстремистик” ташкилот деб топган.
Изоҳ (0)