Украина мудофаа вазири Алексей Резников Россияга қарши урушнинг бир кунлик харажатларини 100 миллион долларга баҳолади. Бу ҳақда у “Ukrinform” нашрига берган интервьюсида маълум қилди.
Бир кунлик уруш бизга 100 миллион долларга тушади. Энди барча йирик волонтёрлик фондларининг бюджетларини ва кунига 100 миллион доллар сарфлайдиган давлатни солиштиринг. Шунчаки, фикр юритинг. Шунинг учун давлатга — ҳарбий-сиёсий раҳбариятга, маҳаллий раҳбарлардан тортиб парламент, ҳукумат, президентгача ҳаммасини волонтёрлар қилаётгани ҳақида даъво қилиш адолатсизликдир, — деди Резников.
У 2022 йил 24 февралдан ҳозирги кунгача кўнгиллилар томонидан етказиб берилган таъминотлар “урушга кетган” нарсаларнинг 3 фоизини ташкил қилишини билдирди.
Резниковнинг тушунтиришича, аслида армия Украина фуқаролари томонидан таъминланади, чунки улар ишлайди ва давлат бюджетига юбориладиган солиқларни тўлайди.
Бугунги кунда армия энг йирик маблағ истеъмолчиси ҳисобланади. Аммо инфратузилма, реконструкция қилиш, ижтимоий ҳимояланмаганларни қўллаб-қувватлаш учун ҳам маблағ керак. Шунинг учун ишлашимиз ва солиқ тўлашимиз зарур. Бизнес фаол бўлиши ва тадбиркорларни қўллаб-қувватлаши керак, — дея таъкидлади Резников.
Резников Украина мудофаа вазири лавозимидан кетмоқда
Зеленский 3 сентябрь куни кечки мурожаатида Украина мудофаа вазири Алексей Резников истеъфога чиқишини, унинг ўрнини эса Украина Давлат мулки жамғармасига раҳбарлик қилаётган Рустем Умеровни эгаллашини айтди.
Рустем Умеров – келиб чиқиши мусулмон қрим-татар бўлган украиналик тадбиркор. Унинг оиласи 1944 йилда Қримдан Марказий Осиёга кўчириб юборилган. Умеров 1982 йил Самарқанд вилоятининг Булунғур туманида туғилган. 1980 йиллар охирида қрим-татарларни ватанига қайтариш бошланганида, Умеровлар оиласи Қримга қайтишга муваффақ бўлган.
Изоҳ (0)