Украина разведкаси Қримда Россия десант кемаларига зарба бериб, уларни ишдан чиқарганини маълум қилди. Бу ҳақда Deutsche Welle хабар берди.
Украина Мудофаа вазирлигининг Бош разведка бошқармаси 10 ноябрга ўтар кечаси босиб олинган Қримда операция ўтказди. Натижада Россия Қора денгиз флотининг кичик десант кемаларига зарба берилди.
Гап 11770 “Серна” тоифасидаги катерлар ҳақида кетмоқда. Бортда экипаж, зирҳли транспорт воситалари, жумладан, зирҳли БТР-82 техникалари бўлгани тахмин қилинмоқда.
Дастлаб Украина Қуролли кучлари Феодосиядаги нефть омборига иккита дрон билан зарба бермоқчи бўлган, бироқ дронлар уриб туширилган. Шундан сўнг Украина қўшинлари казармага Нептун ракетаси билан зарба беришга уринган, бироқ ракета яқин атрофдаги ерга қулаган. Шу билан бирга, тўртта учувчисиз катер “Узкая” кўрфазига кириб, флот катерларини нишонга олган
“Дастлабки маълумотларга кўра, ходимлар орасида қурбонлар йўқ”, — деб ёзади “Рибар” нашри.
Россия Мудофаа вазирлиги 10 ноябрга ўтар кечаси ҳаво ҳужумидан мудофаа кучлари Украинанинг иккита дронини Қрим узра тутиб олганини, яна бири Тула вилоятида уриб туширилганини маълум қилди. Ҳеч қандай кемага нишонга олингани ҳақида хабар берилмаган.
Изоҳ (0)