Йил бошидан буён АҚШ ва НАТОга аъзо бошқа давлатлар томонидан разведка парвозлари сони уч баробарга кўпайди – ҳафтасига еттитадан 21 тагача. Бу ҳақда “РИА Новости” Flightradar24 хизмати маълумотларига таяниб, хабар берди.
Агентликнинг ҳисоб-китобларига кўра, 2023 йил бошида ва баҳорда НАТО самолётлари (асосан АҚШ) кунига битта парвозни амалга оширган: 16—22 январь ҳафтасида етти рейс, 15—21 майда бешта рейс.
Бундан ташқари, ўтган ҳафтада (18—24 сентябрь кунлари) порталнинг кузатув архивидан маълум бўлишича, АҚШ ва унинг НАТО бўйича иттифоқчилари разведка самолётлари ҳамда стратегик дронлари Қрим минтақасида 21 та парвозни амалга оширган. Агентликнинг аниқлик киритишича, парвозларнинг аксарият қисми — 16 тасини АҚШ самолётлари амалга оширган.
Россия Мудофаа вазирлиги Қора денгиз устидаги самолётлар ва дронлар ҳақида мунтазам равишда хабар беради. Хусусан, 27 август куни Россия ҳарбийлари Американинг МQ-9 Reaper дронини тутиб олиш учун Су-30 қирувчи самолётини учирди.
“Россия қирувчиси яқинлашганда, хорижий разведкачи дрон Россия давлат чегарасидан бурилиб кетди”, — дейилади вазирлик хабарида.
Изоҳ (0)