“Қум ва чанг бўронларининг тез-тез кузатилиши аҳоли саломатлигига салбий таъсир қилмоқда” — Танзила Норбоева

Олий Мажлис Сенатининг навбатдаги ялпи мажлисида “Тупроқни муҳофаза қилиш ва унинг унумдорлигини ошириш тўғрисида”ги қонун лойиҳаси муҳокама қилинди.

Танзила Норбоева мазкур қонун лойиҳаси ҳақида фикр билдирар экан, Ўзбекистонда ўттиз йилда тупроқ унумдорлигида фақат пасайиш кузатилаётганини таъкидлади.

“Масалан, 1991 йилда — 58 балл, 2001 йилда — 55 балл, 2011 йилда — 53,9 балл, 2021 йилда — 53,7 баллга пасайган. Суғориладиган ерларимизнинг ярмидан кўпи, яъни 53 фоизи шўрланган.

Оқибатда кейинги йилларда ҳудудларимизда қурғоқчилик, қум ва чанг бўронлари, ҳатто пойтахтда ҳам тез-тез кузатилмоқда. Бу ҳол ҳосилдорликка, биологик хилма-хилликка ва энг муҳими, аҳоли саломатлигига салбий таъсир қилмоқда.

Шу нуқтаи назардан қараганда, мазкур қонун мамлакатимизда тупроқ муҳофазаси ва унинг унумдорлигини оширишда мустаҳакам ҳуқуқий пойдевор вазифасини бажаради”, — деди Сенат раиси.

Муҳокамалардан сўнг қонун лойиҳаси сенаторлар томонидан маъқулланди.

Эслатиб ўтамиз, президент Шавкат Мирзиёев Самарқанд шаҳрида бўлиб ўтган БМТнинг Чўлланишга қарши кураш тўғрисидаги конвенцияси бажарилишини кўриб чиқиш қўмитасининг 21-сессиясида қум ва чанг бўронлари бўйича Самарқанд декларациясини қабул қилиш ташаббусини илгари сурган эди.