Самарқанд шаҳрида 13 ноябрь куни БМТнинг Чўлланишга қарши кураш конвенция си (CRIC-21) ижросини кўриб чиқиш қўмитасининг 21-сессияси ўз ишини бошланди.
CРИC-21 иштирокчилари БМТнинг 2018–2030 йилларга мўлжалланган стратегиясига мувофиқ ер деградациясининг олдини олиш бўйича глобал мақсадларга эришиш бўйича тараққиётни кўриб чиқиш ва тавсиялар бериш имкониятига эга бўлади.
Маросим очилишида президент Шавкат Мирзиёевнинг табрик сўзи ўқиб эшиттирилди.
Ўзбекистон ва бутун Марказий Осиё минтақаси иқлим ўзгаришининг салбий таъсири ва улар келтириб чиқарадиган ижтимоий, экологик муаммоларнинг оғир оқибатларини тўлиқ ҳис қилмоқда.
Бугун биз бир авлоднинг кўз ўнгида йўқ бўлиб бораётган Орол денгизи глобал ҳалокатининг оғир оқибатларига қарши курашяпмиз. Бу таҳдидларнинг барчаси ва бошқа кўплаб омиллар нафақат минтақамизда, балки бутун дунёда аҳоли фаровонлиги ва саломатлигига бевосита таъсир кўрсатмоқда, бу эса Барқарор ривожланишнинг асосий мақсадларига эришиш йўлида ҳамкорликни янада мустаҳкамлаш тақозо этмоқда.
Ўзбекистоннинг жорий сессия якунларига кўра қум ва чанг бўронлари бўйича Самарқанд декларациясини қабул қилиш ташаббуси халқаро экспертлар ҳамжамияти томонидан қўллаб-қувватланишига ишонаман.
Ишончим комилки, мазкур кўп томонлама ҳужжат ана шундай жиддий экологик муаммолардан эрта огоҳлантириш ва самарали курашишга қаратилган умумий саъй-ҳаракатларимизга муҳим ҳисса бўлиб, илмий алмашинувни кенгайтиради, янги техник кўмак дастурлари ва мақсадли инвестиция лойиҳаларини амалга оширишга хизмат қилади, — деди Шавкат Мирзиёев.
Тадбирнинг биринчи ялпи мажлисда иштирок этган БМТнинг чўлланишга қарши кураш бўйича конвенция си ижрочи котиби Иброҳим Тиаунинг таъкидлашича, дунё бўйлаб биз кузатилаётган қурғоқчилик, ўрмон ёнғинлари ва жазирама тўлқинлар бир-бири билан боғлиқ бўлган иқлим ҳамда табиат инқирозларининг аломатларидир.
“2015 йилдан бери тахминан 4 миллион квадрат км соғлом ва унумдор ерлар — тахминан Ўрта Осиё ҳажмига тенг майдон йўқолган. 2030 йилга бориб ердан фойдаланиш бўйича глобал мақсадларга эришиш учун ернинг кейинги деградациясини зудлик билан тўхтатишимиз ва камида 1 миллиард гектар майдонни тиклашимиз керак”, — деди Иброҳим Тиау.
Маълумотлар шуни кўрсатадики, дунёдаги соғлом ва унумдор ерларнинг йиллик йўқотилиши тахминан 100 миллион гектарни ташкил қилади. Мавжуд тенденциялар давом этса, 2030 йилга бориб дунёда ер деградациясининг нейтраллигига эришиш учун 1,5 миллиард гектар майдонни тиклаш керак бўлади. Бироқ қўшимча таназзулни тўхтатиш ва мавжуд мажбуриятларнинг бажарилишини тезлаштириш белгиланган мақсадлардан ошиб кетиши мумкин.
Экология вазири Азиз Абдуҳакимовнинг айтишича, CРИC-21 кўргазмасининг Ўзбекистонда ўтказилиши бежиз эмас, чунки у ер деградациясининг барча салбий оқибатларини — қурғоқчилик, қум ва чанг бўронларидан тортиб қишлоқ хўжалиги маҳсулдорлиги ва биологик хилма-хилликни йўқотишгача бошдан кечираётган энг заиф мамлакатлардан бири мисолидир.
“Асрлар давомида ўзбеклар анъанавий равишда деҳқончилик билан шуғулланиб келган, шу боис ер тарихда энг муҳим тирикчилик манбаси ҳисобланган. Бинобарин, бу муҳим тирикчилик манбасини жиддий таҳдид остида кўриш хавотир уйғотади ва аниқ чора-тадбирлар кўриш зарурлигидан далолат беради”, — деди Азиз Абдуҳакимов.
Тадбир доирасида “CRIC-21 яшил боғи”да дарахт ўтқазилди. Дарахт экишда иштирок этан Олий Мажлис Сенати раиси Танзила Норбоеванинг айтишича, дарахт экиш атроф-муҳит ва жамиятга киритилган энг оқилона сармоядир.
“Мазкур ишлар биологик хилма-хилликни ошириш, туризмни рағбатлантириш, аҳоли саломатлиги ва ҳаво сифатини яхшилашга катта ҳисса қўшади. Дарахт экиш атроф-муҳит ва жамиятимизга киритилган энг оқилона сармоядир. Умид қиламизки, мана шундай сармояларимизнинг меваларидан халқимиз узоқ йиллар давомида баҳраманд бўлади”, — деди Танзила Норбоева.
Таъкидлаш жоизки, Ўзбекистон Республикаси Осиё минтақаси ва МДҲ давлатлари орасида биринчи бўлиб 1995 йилда Бирлашган Миллатлар Ташкилотининг Чўлланишга қарши кураш тўғрисидаги конвенция сини ратификация қилган.
Изоҳ (0)