Қорақалпоғистон Республикасида кўмир сотиб олиш учун ажратилган маблағларни талон-торож қилган МЧЖ раҳбари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Хўжайли туман бўлими томонидан терговга қадар текширув ўтказилди. Текширувда “С.г.” МЧЖ масъул шахслари 2023—2024 йилги куз-қиш мавсумида 18 та таълим ташкилоти ва 1 та оилавий поликлиникага кўмир сотиб олиш учун ажратилган 1,1 миллиард сўмнинг 187,5 миллион сўмини бошқа мақсадларда сарфлагани аниқланган. Шунингдек “Т.Б.” МЧЖ гўёки 1 017 тонна кўмир етказиб бергани тўғрисида сохта ҳужжатларни расмийлаштириб, 931,5 миллион сўмни ўзлаштириш йўли билан талон-торож қилган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Бундан олдин Андижоннинг Андижон, Булоқбоши, Жалақудуқ туманларида аҳолига ажратилган кўмирни талон-торож қилган омбор мудирлари қўлга олингани тўғрисида хабар берилганди. Шунингдек, Ўзбекистоннинг яна учта ҳудудида 1,2 минг тоннадан ортиқ кўмир талон-торож қилингани аниқланган эди.
Изоҳ (0)