Жиззах вилоятининг Шароф Рашидов туманида юк машинаси поезд ҳаракатланувчи кўприкнинг бир қисмини ўпириб кетгани тўғрисида хабар берилганди. “Ўзбекистон темир йўллари” матбуот хизматининг маълум қилишича, ҳозирда кўприкни таъмирлаш ишлари якунланган ва поездлар ҳаракати тикланган.
Қайд этилишича, Жиззах—Сайхун участкасининг 3597-километрида Зомин тумани ва Жиззах шаҳри ўртасида жойлашган темирйўл кўприги остидан ўтаётган Hоwо юк машинаси борти билан унинг бир қисмини шикастлаган.
Воқеа содир бўлганидан кейин юк машинаси ҳайдовчиси дарҳол тўхтаган. Вазиятни ҳал қилиш учун махсус хизматлар ва масъул шахслар юборилган. Хавфсизлик ва тиклаш ишлари учун ушбу темирйўл кўприги бир муддат ёпилган.
“Мутахассислар тезда шикастланган кўприк нурини тиклашга киришди. Ҳозирги вақтда барча тиклаш ишлари якунланди ва поездлар ушбу йўналишда ўз ҳаракатларини тикладилар”, — дейилади хабарда.
“Ўзбекистон темир йўллари” АЖ барча йўл ҳаракати қатнашчиларини, айниқса, темирйўл кўприклари ва ўтиш жойлари яқинида бундай ҳодисаларнинг олдини олиш учун қоидалар ва чекловларга риоя қилишга чақирди.
Аввалроқ Бобур кўчаси ва Тошкент халқаро аэропортини боғловчи йўл ўтказгичнинг биринчи босқич қурилиш-монтаж ишлари якуни бўйича танклар ёрдамида синовдан ўтказилган эди.
Изоҳ (0)