Тошкент шаҳрининг маҳаллий бюджетидан “Пахтакор” футбол клуби ҳисобига 7 миллиард сўм маблағ ўтказиб берилади. Шаҳар ҳокими Шавкат Умрзоқовнинг бу ҳақдаги тегишли қарори “E-qaror” ягона электрон тизимига жойлаштирилди.
Ҳужжатда ёзилишича, “Пахтакор” ФК МЧЖнинг иш ҳақи ва унга тенглаштирилган тўловлар, коммунал хизматлар ва ўйин ўтказиш харажатларини қоплаб бериш мақсадида Тошкент шаҳар ҳокимлигининг клуб устав фондидаги улушини ошириш ҳисобига маҳаллий бюджетнинг захира жамғармаси ҳисобидан 7 миллиард сўм маблағ ажратилади.
Шу сабабли Иқтисодиёт ва молия бош бошқармаси 2023 йил Тошкент шаҳар маҳаллий бюджетига тегишли ўзгартиришлар киритади. Ғазначилик бошқармаси ажратилган маблағни ўрнатилган тартибда молиялаштириш чораларини кўради.
“Пахтакор” ФК МЧЖ (раҳбар: Дмитрий Адисман) клуб устав фондини тақсимланган маблағлар ҳисобига ошириш чораларини кўради ҳамда маблағларнинг мақсадли сарфланишини таъминлайди.
Шавкат Умрзоқов буйруқни имзолашда Вазирлар Маҳкамасининг “Футбол клублари фаолиятининг самарадорлигини ошириш чора-тадбирлари тўғрисида” 2021 йил 30 апрелдаги 261-сон қарори (унда Тошкент шаҳар ҳокимлиги “Бунёдкор” ва “Пахтакор” жамоаларига бош ҳомий экани кўрсатилган), шунингдек, “Пахтакор” клубининг 2023 йил 13 июлдаги мурожаати инобатга олинганини қайд этган.
Изоҳ (0)