Тошкент шаҳар ҳокимлиги 6 ноябрдан ижтимоий объектлар ва кўп квартирали уйларга иссиқлик таъминотини босқичма-босқич етказиб бериш бошланишини эълон қилганди. Бироқ кўп қаватли уйларда иситиш мавсуми белгиланган санадан бошланмади. Пойтахт ҳокимлиги ҳолатга изоҳ бериб, ахборот манбаларидан ҳолат юзасидан ортиқча маъно изламасликка чақирди.
Ижтимоий тармоқларда Тошкент шаҳар ҳокимининг иситиш мавсумини бошлаш тўғрисидаги қарори қабул қилинган сана мавсумнинг амалдаги бошланиш санасидан фарқ қилиши тўғрисидаги маълумотлар тарқалди.
Пойтахт ҳокимлиги матбуот хизматининг қайд этишича, 2023-2024 йилги иситиш мавсумига 3 ноябрда айланма ҳаракат бошланишидан техник старт берилган. Ҳоким қарорининг 2-бандида 2023 йил 3 ноябрь соат 00:00 дан бошлаб пойтахтда иссиқлик манбаларидан иссиқлик тизимининг айланма ҳаракат йўлга қўйилишини инобатга олиш назарда тутилган. Бироқ айланма ҳаракат бошланганидан сўнг, бир қатор муаммолар аниқланган, уларни бартараф этиш қўшимча вақт талаб қилади.
6 ноябрь куни, иссиқлик таъминоти тармоғидаги муаммолар бартараф этилгач, ишга тушириш жадвалга мувофиқ бошланган, лекин таъмирлаш ишларини инобатга олган ҳолда, 7 ноябрга ўтган.
“Ўз навбатида, ҳурматли ахборот манбаларидан бизнинг саъй-ҳаракатларимизни тўғри баҳолашни ва тегишли шаҳар хизматлари фаолияти остида ортиқча маъно изламасликларини сўраймиз. Бизнинг барча ҳаракатларимиз фақат яхшиликка ва пойтахт аҳолиси учун қулай яшаш шароитини яратишга қаратилган”, — дейилади муносабатда.
Вазирлар Маҳкамасининг 2017 йил 15 июлдаги “Коммунал хизматлар кўрсатиш қоидаларини тасдиқлаш тўғрисида”ги 194-сон қарорига асосан иситиш даври ташқи ҳавонинг ўртача суткалик ҳарорати 8 даражадан паст бўлган 5 кунлик давр тамом бўлган кундан кейинги кундан бошланиши, 8 даражадан юқори бўлганда эса тамомланиши керак.
Изоҳ (0)