“Uch oylik bola iste’mol qiladigan ozuqaning ham muddati o‘tib ketgan”. Erkinjon Turdimov og‘riqli masalani muhokama qildi

Samarqand viloyati hokimi Erkinjon Turdimov viloyatdagi oziq-ovqat savdo do‘konlarida muddati o‘tib ketgan mahsulotlar ham sotilayotganini aytib, “do‘konlarimizda vijdonini sotgan sotuvchilar ham, mulkdorlar ham yo‘q emas ekan”, dedi. 

Viloyat hokimligi axborot xizmatining ma’lumot berishicha, Erkinjon Turdimov mazkur masala yuzasidan videoselektor yig‘ilishi o‘tkazgan. 

Jahlim chiqqani, uch oylik bola iste’mol qiladigan “Malyutka”larning ham muddati 6 oylab o‘tib ketgan. Sotuvchi buni bilsa-da, xalqimizni aldab sotayotganini kechirib bo‘lmaydi, — deydi videoselektor yig‘ilishida bu haqda gapirgan hokim. 

Ta’kidlanishicha, mazkur holatni o‘rganish maqsadida viloyat hokimligi tomonidan ishchi guruh tashkil etilgan.

Ishchi guruh Samarqand shahri, Samarqand va Bulung‘ur tumanidagi savdo obyektlarida bo‘ldi, videoreportaj tayyorlandi. Ko‘p joylarda yaroqlilik muddati o‘tib ketgan yoki ishlab chiqarish muddati ko‘rsatilmagan kolbasa, pishloq mahsulotlari sotilayotganini uchratishingiz mumkin, — deyiladi viloyat hokimligi axborot xizmati tarqatgan videoxabarda. 

Ishchi guruh to‘rt kunlik o‘rganishi davomida Samarqand shahri, Samarqand va Bulung‘ur tumanlaridagi 41 ta savdo shoxobchasini o‘rgangan. Ushbu savdo do‘konlarida 1736 dona yaroqlilik muddati o‘tgan mahsulotlar borligi aniqlandi. 

Hurmatli do‘kondorlar, do‘konning egasimisiz? Oziq-ovqat sotyapsizmi? Noinsoflik qilmang, muddati o‘tgan mahsulotlarni sotmang. Yig‘ishtirib olib keting. Bo‘lmasa, biz sizni yig‘ishtirib olishga majbur bo‘lamiz, — dedi viloyat rahbari Erkinjon Turdimov. 

Ishchi guruh vakilining bildirishicha, savdo do‘konlarida qalbaki mahsulotlar ham sotilayotgani aniqlangan. 

Men butun samarqandliklarga murojaat qilmoqchiman, Samarqand viloyati aholisi, nimaiki sotib oladigan bo‘lsangiz, “srogi”ga qarang. Iltimos qilib so‘rayman. Chunki do‘konlarimizda vijdonini yutgan sotuvchilar ham, mulkdorlar ham yo‘q emas ekan. Ayrimlar muddati bir kun o‘tib ketganini bilmay qolishi mumkin, lekin oylab muddati o‘tib ketgan mahsulotlar ham sotilyapti. Bir oylik muddati qolgan bo‘lsa ham olmang, baribir bu biror kuni o‘zining salbiy ta’sirini ko‘rsatadi. Ertaga farzandingizning sog‘lig‘i uchun topgan mablag‘ingizni sarflab, “aptekama-apteka” yugurasiz, — dedi viloyat hokimi.