Самарқанд вилояти ҳокимлигида ўтказилган фаоллар йиғилишида «Обод қишлоқ» ва «Обод маҳалла» давлат дастурлари ижросига совуққонлик қилаётган мансабдорларни жавобгарликка тортиш ҳақида сўз борди. Бу ҳақда «Дарё» мухбири Фарҳод Норбўтаев хабар бермоқда.
Маълум бўлишича, бугун, 20 сентябрь куни вилоят ҳокимлигида Эркинжон Турдимов раҳбарлигида фаоллар йиғилиши ўтказилган. Унда вилоят ҳокимлиги ишчи гуруҳи томонидан олиб борилган ўрганишлар натижасига кўра, «Обод қишлоқ» ва «Обод маҳалла» давлат дастурлари ижроси муҳокама қилинган.
Хусусан, Иштихон, Қўшрабод, Каттақўрғон, Нарпай, Пахтачи, Булунғур, Ургут ва Жомбой туманларида олиб борилаётган ишлар танқид қилинган. Йўлларни асфальтлаш, йўлаклар қуриш, якка тартибдаги уй-жойларни таъмирлаш, электр энергияси, ичимлик суви ва бошқа масалалар юзасидан танқидий фикр-мулоҳазалар билдирилган.
Вилоят ҳокими Эркинжон Турдимов «Обод қишлоқ» ва «Обод маҳалла» давлат дастури доирасида маблағлар ажратилаётганини, дастурга киритилган маҳалла ёки қишлоқлар аҳолиси обод йўллар, пиёдалар йўлаклари, сув таъминоти ёки симёғочларни янгисига алмаштириш каби ижобий ўзгаришларни кутиб умидворлик билан яшаётганини, лекин айрим раҳбарлар бу жараёнга бепарволик қилиб, ўз ҳаракати билан фуқароларда давлатга нисбатан норозилик ҳиссини уйғотаётганини билдирган.
Менинг қишлоғим «Обод маҳалла», «Обод қишлоқ»қа киритилган. Одамлар менинг «столба»м қачон алмашаркан, кўчам, йўлим қачон асфальт бўларкан, сифатли бўларканми, ширин сувни қачон ичаман, деб ўтирибди. Ким у ноинсоф, йўлни одамларнинг устидан куладиган қилиб кетадиган. Давлатнинг пулини совурмоқчи бўлган. Эй виждонсиз, давлатга нисбатан халқнинг нафратини қўзғаяпсан, норозилик кайфиятини кучайтиряпсан, — деди вилоят ҳокими Эркинжон Турдимов.Йиғилиш давомида мансабдор шахсларга ишни ўз вақтида сифатли бажариши шартлиги билдирилган. Муҳокамалардан сўнг ўнга яқин мансабдорни хизмат вазифасига совуққонлик билан муносабатда бўлганлиги учун жавобгарликка тортиш масаласи кўриб чиқилиши белгиланган.
Изоҳ (0)