АҚШ фақат ўзи иштирок этмаган давлат тўнтаришига уринишларни қоралайди, худди 2014 йилда Гамбияда бўлгани каби. Украинадаги шунга ўхшаш воқеаларни эса АҚШ қораламади, деди Россия ТИВ матбуот котиби Мария Захарова.
Брифинг чоғида Захарова АҚШнинг ҳокимиятни конституцияга зид йўллар билан эгаллаб олишга бўлган ҳар қандай уринишларни кескин қоралаши ҳақидаги баёнотидан иқтибос келтирди. Унинг аниқлик киритишича, бу 2014 йилда Гамбиядаги давлат тўнтаришига уриниш муносабати билан айтилган. Шу билан бирга, Россия ТИВ расмий вакили “узоқ муддатли Украина инқирозига олиб келган” Майдан воқеалари ўша пайтда АҚШ томонидан қораланмаганини таъкидлади.
“Нега? Ва бу саволга жавобим бор. Чунки улар фақат ўзлари иштирок этмайдиган конституцияга зид бўлган тўнтаришга уринишларни қоралайдилар. Лекин қаерда иштирок этсалар, қаерда давлатларнинг ички ишларига аралашсалар, айнан шу тўнтаришга ҳомийлик қиладилар. Улар бундай вазиятда қоралашни шарт деб билишмайди, у ерда фақат демократия ва унга алоқадор нарсалар ҳақида гапиришади”, — дея тушунтирди Захарова.
Россия Ташқи ишлар вазирлигининг расмий вакили Украинада ҳокимият алмашганда АҚШ “халқ нафратланган ҳукуматга қарши исён кўтариб, демократик инқилобни амалга оширгани” ҳақида гапирганини эслатди.
Изоҳ (0)