Европа Иттифоқи Украинани хавфсизлик бўйича узоқ муддатли мажбуриятлар билан таъминлаш стратегиясини шакллантирди.
Шу билан бирга, Европа Иттифоқининг Украинанинг ҳарбий харажатлари учун тўрт йил давомида 20 миллиард евро ажратиш ҳақидаги дастлабки режаси иттифоққа аъзо давлатлар ўртасидаги келишмовчилик туфайли бажарилмаслиги мумкин, деб ёзади Bloomberg.
Bloomberg қўлга киритган Украинани узоқ муддатли қўллаб-қувватлаш ҳақидаги ҳужжат лойиҳасида украиналик ҳарбийларни тайёрлаш ва мамлакат мудофаа саноатини ривожлантириш учун маблағ ажратиш кўзда тутилган. Агентлик маълумотларига кўра, Европа Иттифоқи давлатлари буни ҳафта охиригача ёки келаси ой бошида муҳокама қилади.
Шу билан бирга, деб ёзади Bloomberg, ёзда Украина қуролли кучлари эҳтиёжларини қондириш учун 20 миллиард еврога яқин махсус жамғарма яратиш ташаббуси “хавф остида қолиши мумкин”. Агентлик суҳбатдошига кўра, Европа Иттифоқига аъзо айрим давлатлар, жумладан, Германия бу режа шартларига рози эмас.
Бундан ташқари, Bloomberg манбасининг қайд этишича, Украинани Европа Иттифоқи номидан қўллаб-қувватлаш учун маблағ ажратиш Венгрия томонидан блокланмоқда. Унга кўра, Будапешт Европа Иттифоқи аввало Украинага нисбатан умумий стратегияни муҳокама қилиши зарурлигини таъкидламоқда.
Reuters ҳам ноябрь ойи бошида Европа Иттифоқининг Украинага 20 миллиард евролик ҳарбий ёрдам ажратиш режаси Германияда қаршиликка учрагани ҳақида хабар берган эди.
Келишмовчиликлар фонида Европа дипломатияси раҳбари Жосеп Боррел Украинага тўрт йил давомида ҳарбий ёрдам сифатида 5 миллиард евро ажратишни таклиф қилди.
Изоҳ (0)