“Қуролларингизни Киев режимига қарши ишлатинг ёки таслим бўлинг” — Мария Захарова украиналик ҳарбийларга мурожаат қилди

Россия Ташқи ишлар вазирлигининг расмий вакили Мария Захарова Украина Қуролли кучлари аскарларига қуролларини Киев режимига қарши ишлатишни ёки таслим бўлишни тавсия қилди. Захарованинг мурожаати Россия ТИВ сайтига жойлаштирилган.

“Биз ўз мамлакатини босиб олган бандит хунтанинг жиноий моҳиятини тушунадиган украиналик ҳарбий хизматчиларга мурожаат қилиб айтмоқчимизки, ўз қуролингизни ҳукумат тепасидагиларга қарши ишлатинг ёки қўшинларимизга таслим бўлинг”, деган Захарова.

Захарованинг қўшимча қилишича, таслим бўлган Украина ҳарбийларига инсоний муносабат кафолатланади.

Шунингдек, у Киевнинг жиноятчи режими НАТО қуролларидан фойдаланган ҳолда Россия шаҳар ва қишлоқларини ўққа тутишни тўхтатмаётганини таъкидлади.

“Уларнинг ҳаракатлари тинч аҳоли, жумладан, болалар орасида қурбонларни келтириб чиқармоқда”, — деди Россия Ташқи ишлар вазирлигининг расмий вакили.