Шимолий Корея бортида айғоқчи сунъий йўлдоши бўлган баллистик ракетани муваффақиятли учирганини эълон қилди. Бу ҳақда KCNA хабар берди.
“Малиген-1” сунъий йўлдоши Соҳе космодромидан “Чоллима-1” ракетаси ёрдамида учирилган. Ракета парвози маҳаллий вақт билан тахминан 22:43 да амалга ошган. Ракета берилган маршрут бўйлаб нормал учиб, 705 сония ўтиб орбитага айғоқчи сунъий йўлдошни қўйиб юборган. Жараённи космодромдан Шимолий Корея етакчиси Ким Чен Ин кузатган.
Жанубий Корея ва Япония расмийлари сунъий йўлдош орбитада бўлган ёки йўқлигини дарҳол текшира олмаслигини билдирди. Пентагон матбуот котиби Сабрина Сингхнинг айтишича, америкалик ҳарбийлар учирилиш муваффақиятли бўлган ёки йўқлигини аниқлашда давом этмоқда.
Жанубий Корея Шимолий Корея баёнотига жавобан ҳарбий кескинликни камайтиришга қаратилган 2018 йилда имзоланган Кореялараро келишув қисмларини амалга оширишни тўхтатиш чораларини кўришини билдирди.
Бу қадам мамлакатлар ўртасидаги ҳарбий чегара чизиғи атрофидаги ҳудудда разведка ва кузатув операцияларини қайта бошлашни ўз ичига олади.
Шимолий Кореянинг бу йилги айғоқчи сунъий йўлдошини орбитага олиб чиқиш бўйича биринчи уриниши 31 май куни бўлиб ўтган ва ракета ҳаводан кўтарилганидан бир неча дақиқа ўтиб, муваффақиятсизликка учраган. Август ойи охирида ҳам Пхеньян нинг айғоқчи сунъий йўлдошни орбитага олиб чиқишга уриниши зое кетди. Бу сафарги парвозда ракетанинг учинчи қисмида муаммолар юзага келган, ракетанинг қисмлари Филиппиндан 600 километр шарқда қулаган.
Изоҳ (0)