Украина келажаги Европа Иттифоқи билан боғлиқ. Бу ҳақда Еврокомиссия раҳбари Урсула фон дер Ляйен Евромайдон бошланганининг 10 йиллиги муносабати билан Х ижтимоий тармоғидаги постида ёзган.
Унинг сўзларига кўра, 2013—2014 йилларда Украинадаги воқеалар бутун Европани ўзгартириб юборди.
“10 йиллик қадр-қиммат. Ғурур. Озодлик истаги. Евромайданнинг совуқ қиш кечалари Европани бутунлай ўзгартирди. Бугун бу ҳар қачонгидан ҳам аниқ кўринмоқда. Украинанинг келажаги Европа Иттифоқи билан боғлиқ. Майдан курашган келажак ниҳоят бошланди”, — деди Урсула фон дер Ляйен.
Евромайдан деб номланган оммавий, бир неча ой давом этган норозилик намойиши 2013 йил охирида бошланган ва 2014 йилнинг баҳоригача давом этган.
Киевдаги намойишчилар чодирлардан шаҳарча қуриб, қатор маъмурий биноларни эгаллаб олишди. Ўша пайтда Украина президенти лавозимини эгаллаб турган Виктор Янукович ва Вазирлар Маҳкамаси деярли тўлиқ таркибда мамлакатни тарк этишга мажбур бўлганди.
Изоҳ (0)