Италия суди мамлакат жанубидаги Калабрия вилояти фаолият юритган “Ндрангета” жиноий мафия гуруҳига алоқадор 200 дан ортиқ кишини турли муддатларга қамоқ жазосига ҳукм қилди. Бу сўнгги 30 йил ичида мамлакатдаги энг йирик мафия иши бўйича суд бўлди.
Қайд этилишича, мазкур ишда 400 дан ортиқ модда, жумладан, гиёҳвандлик воситалари ва қурол савдоси, товламачилик ва мафия билан алоқадорликда айбланган 338 киши иштирок этган. Прокурорлар 322 айбланувчига жами 5000 йилга яқин қамоқ жазосини сўраган.
Натижада суд 131 нафар айбланувчини оқлаган ва 207 нафарини жами 2000 йилдан ортиқ қамоқ жазосига ҳукм қилган. Ҳукмнинг эълон қилиниши тахминан бир ярим соат давом этган.
Энг оғир жазо “Ндрангета”нинг икки етакчига — Саверио Рационале ва Доменико Бонавотега берилди — 30 йиллик қамоқ жазоси. Айбланганлар орасида 11 йиллик қамоқ жазосига ҳукм қилинган собиқ депутат Жанкарло Питтелли ҳам бор.
Ҳукмлар Ламеция-Терме шаҳрида шу мақсадда махсус қурилган мажмуада бўлиб ўтган қарийб уч йиллик суд жараёнини якунлади. Суд жараёнида яна 70 нафар судланувчи 2021 йил ноябрь ойида жазо муддатини қисқартириш эвазига тезкор суд жараёнини танлаб, айбдор деб топилди.
“Ндрангета” мафия гуруҳи ҳақида
Айблов эълон қилинган шахсларнинг аксар қисми Италия, Германия, Швейцария ва Болгарияда 2019 йилда ўтказилган тезкор тадбирлар давомида қўлга олинган. Ҳукм ўқилган шахслардан бири — Манкузо мафия клани раҳбари — “Амаки” лақабли Луижи Манкузо ҳисобланади. Ҳукм ўқилишидан олдин ҳам у 20 йил қамоқда ўтирган.
Италия прокуратураси мамлакатда энг кучли таъсир доиралардан бирига эга замонавий мафия гуруҳи “Ндрагета”га қарши суд жараёни ўрнак бўлишига умид қилмоқда. Клан қурол-яроқ, одамлар ва гиёҳванд моддалар савдоси билан шуғулланади, кўп миллиардлик пул айланмасига эга. 2016 йилда унинг аъзолари ҳатто Италия шимолидаги кўчмас мулк операцияларда ҳам айбланган.
Изоҳ (0)