Тошкент вилоятининг Янгийўл шаҳридаги туғуруқхонада етти ойлик ҳомиласи бор аёл вафот этгани, унинг турмуш ўртоғи бунда шифокорларни айблагани хабар берилганди. Соғлиқни сақлаш вазирлиги берган маълумотга кўра, ҳомиладор аёлда тўсатдан ўлим ҳолати кузатилгани ундаги нейрофиброматоз хасталиги билан боғлиқ бўлган.
1997 йилда туғилган ҳомиладор аёл М.Қ. Янгийўл шаҳридаги туғуруқ муассасасига шаҳар кўп тармоқли марказий поликлиникаси йўлланмаси билан мурожаат қилган ва 2023 йилнинг 14 ноябрь куни (видеомурожаатда айтилганидек, 13 ноябрь куни эмас) Ҳомиладорлик-2, 31-32 ҳафта, муддатидан аввалги туғуруқ хавфи ташхиси билан қабул қилинган.
Марказда бемор зарур текширувлардан ўтказилиб, даво чоралари олиб борилган. Шу куни кечқурун аёлда кўнгил айниши ва қайт қилиш ҳолати кузатилган. Бемор ушбу ҳолатни сомса ва салат ейиши билан боғлаган. Инфексионист ва хирург кўриклари ташкил этилиб, ошқозон-ичак фаолияти бузилиши қайд қилинган. УТТ текширувида бачадон нормотонусда, жигар ва ўт пуфаги фаолияти нормал экани ташхисланган.
Шундан сўнг ҳомиладор аёл ундан хабар олгани келган турмуш ўртоғи билан учрашган. Палатага қайтгандан сўнг кутилмаганда аёлнинг аҳволи оғирлашиб, ҳушидан кетган. Кўрсатилган реанимацион шошилинч тиббий ёрдам чораларига қарамай, беморда биологик ўлим ҳолати юз берган, — дейилади вазирлик маълумотида.
Суд тиббиёт экспертизасининг дастлабки хулосасига кўра, марҳумада ҳомиладорликка алоқадор бўлмаган нейрофиброматоз хасталиги асоратлари оқибатида талоқ артериясининг, ичак тутқич томирларнинг спонтан ёрилиши тўсатдан ўлим ҳолатига олиб келган.
Артерияларнинг тўсатдан ёрилиши – наслий хасталик ҳисобланган нейрофиброматоз (Реклингхаузен синдроми)нинг асорати бўлиб, аксарият ҳолатларда ўлим билан якунланади. Ҳолат юзасидан ҳуқуқни муҳофаза қилувчи органлар суриштирув олиб бормоқда. Якуний хулоса ҳақида қўшимча хабар берилади, — дейди масъуллар.
Изоҳ (0)