Фарғона вилоятининг Бувайда туманида Damas автомобили иштирокида ЙТҲ содир бўлгани, унда мактаб ўқувчилари ҳам вафот этгани хабар берилганди. Вилоят ИИБ ахборот хизмати мазкур воқеа бўйича “Дарё”га расмий маълумот берди.
Жорий йилнинг 21 ноябрь куни соат 08:20 ларда Учкўприк тумани, “Меҳнатобод” МФЙ ҳудудида 2000 йилда туғилган ҳайдовчи Ш.Э Isuzu русумли автомобилни бошқариб кетаётиб, оралиқ масофани сақламасдан светофорнинг қизил ишорасида тўхтаб турган, ҳайдовчи 1994 йилда туғилган Б.М. бошқарувидаги Damas билан тўқнашиб, йўл-транспорт ҳодисаси содир этган. Натижада Damas автомашинаси йўловчилари 1987 йилда туғилган М.Д ва 1988 йилда туғилган Г.Қ. (аёл)лар тан жароҳати олиб, воқеа жойида вафот этган, — дейилади вилоят ИИБ ахборот хизмати тарқатган маълумотда.
Қўшимча қилинишича, ҳодиса оқибатида яна 4 нафар шахс тан жароҳати олиб, даволаниш учун шифохонага ётқизилган.
Мазкур ҳолат юзасидан туман ИИБ ҳузуридаги тергов бўлими томонидан Ш.Э.га нисбатан Жиноят кодексининг 266-моддаси 3-қисми “а” (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига олиб келса) банди билан жиноят иши қўзғатилиб, “қамоқ” эҳтиёт чораси қўлланилган.
Изоҳ (0)