Ижтимоий тармоқларда Амударёнинг қуйи оқими акс этган сурат кўрсатилиб, дарёнинг суви қуриб қолгани айтилган хабар тарқалган эди.
“Ҳолат жуда чатоқ, экспертларнинг айтишича, яқин йилларда Ўрта Осиё халқларининг катта қисми уйларини ташлаб чиқиб кетишади. Қурғоқчилик кетидан очарчилик келиши табиий ҳолат, сув учун уруш бўлиши кутилмоқда”, — дейилган тарқалган хабарда.
Мазкур хабар юзасидан Амударё сув хўжалиги бирлашмаси “Дарё”га изоҳ берди.
“Жорий 2023 йилги суғориш даври тугаганлиги сабабли Туямўйин сув омборидан Амударёнинг қуйи оқимига санитар сув қолдирилиб, сув қисқартирилган. Туямўйин сув омборига келаси йил учун сув йиғиш бошланган”, — дейилади бирлашма изоҳида.
Қўшимча қилинишича, сурат Туямўйин сув омборининг пастки қисмида, яъни сув сатҳи тушган жойдан олинган бўлиши мумкин.
Маълумот учун, Туямўйин сув омбори Амударёнинг қуйи оқимидаги Туямўйин тор дарасида қурилган йирик гидротехника иншоотидир. Дарё сувини ирригация ва энергетика мақсадларида мавсумий ростлаш учун хизмат қилади.
Изоҳ (0)