Шавкат Мирзиёев 15 сентябрь куни Оролни қутқариш халқаро жамғармаси таъсисчи давлатлари раҳбарлари кенгашининг навбатдаги йиғилишида Амударё ва Сирдарё ҳавзаларини ривожлантириш бўйича узоқ муддатга мўлжалланган режалар ишлаб чиқишни таклиф қилди.
Президент матбуот хизматининг маълум қилишича, Шавкат Мирзиёев Оролни қутқариш халқаро жамғармаси бу, аввало, Марказий Осиё мамлакатларининг глобал миқёсдаги энг ўткир муаммолардан бирини ечиш бўйича кўп томонлама ҳамкорлик борасидаги ноёб тажрибаси эканини, жамғарма сув ва экология соҳасида минтақавий ҳамкорликнинг энг муҳим платформасига айланганини алоҳида қайд этди.
“Жамғарманинг ишчи органларига халқаро консултантлар иштирокида Амударё ва Сирдарё ҳавзаларини ривожлантириш бўйича узоқ муддатга мўлжалланган режалар ишлаб чиқиш топшириғини берсак, мақсадга мувофиқ бўлар эди”, — деди президент.
Шавкат Мирзиёев ушбу дарёлар ҳавзаларида вазиятнинг ривожланиши бўйича турли сценарийларни моделлаштиришни назарда тутиш муҳим эканини билдириб ўтди.
“Бундай стратегик ҳужжатларнинг қабул қилиниши минтақамизда сув-энергетика ресурсларини интеграциялашган ҳолда бошқариш сиёсатини мувофиқлаштиришга имкон беради, деб ишонаман”, — деб таъкидлади давлат раҳбари.
Президент Марказий Осиё мамлакатларнинг ҳар бири аниқ мақсадли кўрсаткичларни белгилаган ҳолда, минтақавий лойиҳаларга четдан кўмакни жалб этиш бўйича ўзига мажбурият олиши лозимлигини ҳам айтиб ўтди.
Изоҳ (0)