“Яқин 20 йилда Амударё ва Сирдарё оқими 15 фоизга қисқариши мумкин” — Шавкат Мирзиёев

Яқин 20 йилда Амударё ва Сирдарё оқими 15 фоизга қисқариши мумкин. Бу ҳақда Шавкат Мирзиёев БМТ Бош Ассамблеясининг 78-сессиясида сўзлаган нутқида айтиб ўтди.

Президент ўз нутқида кейинги 30 йилда минтақада ҳаво ҳарорати бир ярим градусга кўтарилганини қайд этиб ўтди. Бу – дунёдаги ўртача исишдан икки карра кўпдир. Оқибатда музликлар умумий майдонининг қарийб учдан бир қисми йўқолиб кетди.

“Ушбу тенденция сақланиб қолса, яқин йигирма йилда минтақамиздаги иккита йирик дарё — Амударё ва Сирдарё оқими 15 фоизга қисқариши мумкин. Жон бошига сув билан таъминланиш даражаси 25 фоизга, қишлоқ хўжалиги экинлари ҳосилдорлиги эса 40 фоизга камайиши кутилмоқда”, — деди давлат раҳбари.

Президент Орол денгизи фожиасига қарши курашни давом эттираётган Марказий Осиё иқлим ўзгаришлари олдида энг заиф минтақалардан бирига айланаётганини ҳам қайд этиб ўтди.

Давлат раҳбарининг таъкидлашича, глобал муаммо бўлган Орол фожиаси оқибатларини бартараф этиш йўлида Ўзбекистон ўз имкониятлари даражасида ҳаракат қилмоқда. Сўнгги йилларда Орол денгизининг қуриган тубида 1,7 миллион гектар майдонда қурғоқчиликка чидамли ўсимликлардан иборат яшил ҳудудлар барпо этилди. Бу саъй-ҳаракатларни давом эттириш учун халқаро ҳамжамиятнинг қўллаб-қувватлаши жуда муҳим.

Шавкат Мирзиёев агар ўз вақтида таъсирчан чоралар кўрилмаса, ушбу муаммолар оқибатлари минтақадаги ижтимоий-иқтисодий барқарорликка жиддий путур етказишини қайд этди.

“Бу вазиятдан келиб чиққан ҳолда, биз Бирлашган Миллатлар Ташкилоти Бош котибининг Сув ресурслари бўйича махсус вакили лавозими таъсис этилишини қўллаб-қувватлаймиз. Марказий Осиё сувни тежайдиган технологиялар платформасини яратиш жараёнида ъБирлашган Миллатлар Ташкилоти — сув ресурслариъ механизмини ишга солиб, энг илғор технологияларни жалб этиш ва татбиқ қилиш тарафдоримиз”, — деди президент.

Шавкат Мирзиёев 15 сентябрь куни Оролни қутқариш халқаро жамғармаси таъсисчи давлатлари раҳбарлари кенгашининг навбатдаги йиғилишида Амударё ва Сирдарё ҳавзаларини ривожлантириш бўйича узоқ муддатга мўлжалланган режалар ишлаб чиқишни таклиф қилганди.