Бишкек шаҳар суди мамлакат чегарасини ноқонуний кесиб ўтишда гумонланиб қўлга олинган россиялик фаол Мансур Мовлаевни депортация қилиш бўйича қарор қабул қилди. Бу ҳақда Қирғизистон Олий судига таяниб, “ТАСС” хабар берди.
“Бишкек шаҳар судида Мансур Мовлаевга нисбатан жиноят иши кўриб чиқилди. Унинг шу кунгача жазони ўтагани инобатга олиниб, суд залидан озод қилинди”, — дейилади хабарда.
Суд Россия фуқаросини мамлакатдан чиқариб юбориш мажбуриятини Миллий хавфсизлик давлат қўмитаси ИИВ ва республика миграция хизмати зиммасига юклади.
“Бишкекнинг Первомайск тумани прокурори катта ёрдамчисининг апелляция аризаси ва адвокатнинг шикояти қаноатлантирилмади”, — дейилган судда.
Мовлаев ёзда Қирғизистон аэропортида мамлакат чегарасини ноқонуний кесиб ўтишга гумонланиб қўлга олинганди. Октябрь ойида унга 6 ой ахлоқ тузатиш колонияси тайинланган эди. Қирғизистон ҳудудидаги тергов изоляторида 3 ой ўтирди, бу эса колонияда жазо ўташнинг 6 ойига тенг ҳисобланади — мамлакат қонунчилигига кўра, изолятордаги бир кун жазони ўташ колониясидаги икки кунга тенг.
Мансур Мовлаев бир неча бор Чеченистонда инсон ҳуқуқлари бузилиши ва сиёсий репрессияларга қарши чиққан. У республика раҳбари Рамзан Қодировни танқид қилган. 2020 йилда у уч йиллик қамоқ жазосига ҳукм қилинди. 2022 йилда Мовлаев шартли равишда озодликка чиқарилган, бироқ у Чеченистоннинг Шалинский тумани ички ишлар бошқармаси ходимлари томонидан ҳибсга олинган. Мовлаев Россиядан қочишга муваффақ бўлган ва федерал қидирувга берилган.
Изоҳ (0)