Чеченистон раҳбари Рамзан Қодиров рухсат этилмаган оммавий хатти-ҳаракатларнинг олдини олиш учун ҳуқуқ-тартибот идоралари ходимлари ўқ узиши, огоҳлантирувчи ўқларга эътибор қилмаганларни отиб ўлдириши кераклигини айтди.
“РИА Новости” хабарига кўра, Қодиров бу ҳақда республика ҳукуматида Ички ишлар вазирлиги ва Миллий гвардия вакиллари иштирокида бўлиб ўтган йиғилишда гапирган:
“Рухсат этилмаган тартибсизликларга борадиган битта одам бўлса ҳам ушлаб, қаманг. Ёки ҳавога учта огоҳлантирувчи ўқ узинг ва шундан сўнг, агар у одам қонунга риоя қилмаса, тўртинчи ўқни пешонасига жойланг. Қайтиб чиқмайди. Бу менинг буйруғим”.
“РИА Новости” Қодиров айнан қандай “рухсатсиз тартибсизликлар” ҳақида гапираётганига аниқлик киритмади, бироқ Чеченистон раҳбари аввалроқ республикада Махачқалъа аэропортидаги исёнга ўхшаш “провокацияни тўхтатишга муваффақ бўлганини” айтгани ҳақида эслатди.
29 октябрь оқшомида Доғистонда Тель-Авивдан “исроиллик қочқинлар” ўтирган самолёт келиши ҳақидаги хабарлар пайдо бўлгач, юзлаб одамлар Махачқалъа аэропортига тўпланишди. Тўполончилар полиция ходимларига ҳужум қилди ва йўловчиларни ушлаб, сўроққа тутди. Ички ишлар вазирлиги 150 га яқин тартибсизлик иштирокчиси аниқлангани, улардан 83 нафари қўлга олингани ҳақида хабар берди.
Изоҳ (0)