Андижон вилоятида 17—20 ноябрь кунлари ўтказилган рейд тадбирида 300 нафар ҳайдовчининг автомашинаси жарима майдонига тортилди. Бу ҳақда Мажбурий ижро бюроси “Дарё”га маълум қилди.
Айтилишича, йўл ҳаракати қоидаларини бузганлик учун чиқарилган қарорлар ижросини таъминлаш мақсадида МИБ Андижон вилоят бошқармаси ҳамда Ичи ишлар бошқармаси жамоат хавфсизлиги департаменти ЙҲХ хизмати ходимлари ҳамкорликда қўшма рейд тадбирлари ўтказган.
“Андижон шаҳрида ўтказилган рейд тадбирида 17—20 ноябрь кунлари йўл ҳаракати қоидаларини бузганлиги учун қўлланилган жарималарни тўламай келаётган 300 нафар ҳайдовчининг автотранспорт воситаси жарима майдончасига жойлаштирилди”, — дейилади МИБ ахборотида.
Қўшимча қилинишича, тадбир давомида қарздорлиги мавжуд ҳайдовчилардан 1 минг 364 та қоидабузарлик учун 626 миллион 585 минг сўм қарздорлик ундирилган.
Изоҳ (0)