Хоразмда ҳам электр энергиясидан ноқонуний фойдаланиб келган майнинг ферма аниқланди (видео)

Хоразм вилоятининг Урганч туманида электр энергиясидан ноқонуний фойдаланиб келган ноқонуний майнинг ферма аниқланди.

Энергетика вазирлиги ҳузуридаги “Ўзэнергоинспекция” томонидан ҳуқуқни муҳофаза қилувчи органлар ҳамда электр таъминоти корхонаси мутахассислари билан ҳамкорликда ўтказилган тадбирда Урганч туманидаги жойлашган “С.” МЧЖнинг биносида майнинг қурилмаларидан ноқонуний фойдаланиб келинаётгани маълум бўлган.

Хусусан, фуқаро О.О. га тегишли умумий истеъмол қуввати 228,8 кВтни ташкил этадиган майнинг қурилмалари электр тармоғига ўзбошимчалик билан уланган.

Ҳолат бўйича электр энергиясидан фойдаланиш қоидалари талабларини бузганлиги бўйича далолатнома расмийлаштирилиб, дастлабки ҳисоб-китобларга кўра давлат манфаатларига 1 миллиард 60 миллион 205 минг сўм зарар етказилгани аниқланган.

Мазкур ҳолат юзасидан тегишли ҳужжатлар расмийлаштирилиб, ҳуқуқни муҳофаза қилувчи органларга юборилган.

Бундан аввал Тошкентда яшовчи фуқаро ўз уйида қўлбола усулда ясалган майнинг крипто-активлари қурилмасини умумий фойдаланишдаги электр тармоғига ўғрилик йўли билан улаб, жами 540 миллион сўмлик электр энергиясидан ноқонуний фойдалангани аниқланганди. Фарғона вилоятининг Қўқон шаҳрида ҳам электр энергиясидан ноқонуний фойдаланиб келган майнинг ферма аниқланганди. Навоийда аниқланган ноқонуний майнинг ферма эса давлатга 24,4 миллиард сўм зарар келтирганди.