Фарғона вилоятининг Учкўприк тумани Камбағалликни қисқартириш ва бандлик бўлими бошлиғи прокурор топшириғи билан дам олиш куни пахта даласига юборилиб, қайтишда ЙТҲга учрагани айтилмоқда. Айни пайтда масъул шифохонада, оғир аҳволда қолмоқда.
“Дарё” мазкур хабарга аниқлик киритиш мақсадида Камбағалликни қисқартириш ва бандлик вазирлиги ахборот хизмати раҳбари Фахриддин Ҳайитов билан боғланди.
Вазирлик вакили ЙТҲ ҳақидаги хабар ва ходимнинг шифохонада эканини тасдиқлади.
Дам олиш куни иш билан кўчага чиққанми ёки бошқа сабабми, буниси ҳозирча бизга қоронғи. Бу маълумот ўрганилмоқда. Тез орада аниқланган ҳолат бўйича маълумот берамиз, — деди вазирлик ахборот хизмати раҳбари.
Facebook фойдаланувчиси, журналист Шарифа Муроднинг “Дарё”га қўшимча қилишича, Учкўприк тумани камбағалликни қисқартириш ва бандлик бўлими бошлиғи мажбурий меҳнат қурбони бўлиши мумкин.
Якшанба, 1-октябр дам олиш куни Фарғона вилоятидан пахта масаласида Учкўприкка бириктирилган прокурорнинг топшириғи билан у Меҳнатобод ҳудудига пахтага чиққан одамлар ҳақида маълумот йиққани борган бўлган. Қайтишда аварияга учраган. Айни пайтда шифохонада аҳволи оғир. Унинг қандли диабет касаллиги бўлгани учун операция ҳам қилишолмаётган экан, — дейди журналист.
“Дарё” воқеалар ривожини кузатишда давом этади.
Эслатиб ўтамиз, АҚШда жойлашган 300 дан ортиқ корхона ва ташкилотлардан иборат Cotton Campaign коалицияси 2009 йилда ўзбек пахтасини бойкот қилиш ташаббуси билан чиққанди. Коалиция ўша вақтда Ўзбекистон ҳукумати “1 миллиондан ортиқ болалар ва катталарни, жумладан, тиббиёт ходимлари, бюджет ходимлари ва талабаларни ҳар йили терим мавсумида пахта теримига мажбурлагани”ни айтган эди.
Cotton Campaign ҳамкори бўлган Инсон ҳуқуқлари бўйича Ўзбекистон форуми 2021 йилда аҳоли пахта йиғим-терими даврида ҳукумат томонидан мажбурий меҳнатга жалб қилинмагани ҳақида эълон қилганидан сўнг, бойкот якунланди. 2022 йилнинг март ойида Cotton Campaign халқаро коалицияси Ўзбекистон пахтасига эълон қилинган глобал бойкотни бекор қилди.
Изоҳ (0)