Андижонда Суриядаги террорчилар сафига бориб қўшилган шахсга нисбатан қидирув эълон қилинди, деб хабар беради вилояти ИИБ ахборот хизмати.
Маълум қилинишича, Асака туманида яшовчи 25 ёшли Фаррух Қорабоев 2020 йил февралда Россияга ишлаш учун кетган. У ерда эса экстремистик ғоялар таъсирига тушиб қолган.
Ўша йилнинг ноябрида Қорабоев Туркия орқали Сурияга ўтиб, у ерда “Тавҳид ва жиҳод катибаси” террористик ташкилоти сафига қўшилган ва ижтимоий тармоқлар орқали ақидапарастлик билан йўғирилган маълумотларни тарқатган.
Ҳуқуқ-тартибот органлари томонидан олиб борилган суриштирув, тезкор қидирувлари натижасида Фаррух Қорабоевга нисбатан 2021 йилда Жиноят кодексининг 244-модда (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми билан қидирув эълон қилинган.
Бундан аввал халқаро террорчилик ташкилотлари сафига қўшилган ўзбекистонлик эркак ва унинг ўғли қидирувга берилгани хабар қилинганди. Шунингдек, қизлари билан халқаро террорчилик ташкилоти жангарилари аъзоси бўлган ўзбекистонлик аёл ҳам қидирилмоқда. Ушбу аёл ҳам Россияда яшовчи эркак билан танишиб, икки қизи билан дастлаб Озарбайжон орқали Туркияга, у ердан эса Сурияга борган ва халқаро террорчилик ташкилотининг жангариларига бориб қўшилган.
Изоҳ (0)