“Халқаро молия институтлари ва хорижий ҳукумат молия ташкилотлари билан амалга оширилаётган лойиҳаларни янада жадаллаштиришга доир қўшимча чора-тадбирлар тўғрисида”ги президент фармони имзоланди.
Ҳужжат билан бюджет ташкилотлари, давлат корхоналари ҳамда ўз устав фондида (устав капиталида) давлат улуши 50 фоиз ва ундан ортиқ бўлган юридик шахслар томонидан сотиб олинадиган товарларни (хизматларни) реализация қилишга доир айланмани 2028 йил 1 январга қадар ҚҚСдан озод қилиш назарда тутилмоқда.
Имтиёз ижтимоий соҳани ривожлантириш учун халқаро молия институтлари ва хорижий ҳукумат молия ташкилотларидан жалб қилинган ва жалб қилинадиган давлат ташқи қарзи ҳисобидан (бундан тижорат банклари орқали қайта молиялаштириладиган ёки қайта кредитланадиган маблағлар мустасно) тўлиқ ёки қисман амалга ошириладиган лойиҳалар доирасида татбиқ этилади.
Ҳужжат қонун ҳужжатлари маълумотлари миллий базасида эълон қилинган ва 2023 йил 16 ноябрдан кучга кирди.
Март ойида Ўзбекистонга олиб киришда божхона божидан озод этиладиган товарлар рўйхати тасдиқланганди. Апрелда эса мамлакатда бир қатор қурилиш материаллари импорти 2025 йилгача божхона божидан озод қилиниши тўғрисида хабар берилган эди.
Изоҳ (0)